Nongstoiñ, Ïaïong 20: Namar ka jingtrei torti jong u kontraktor ïa ka surok Riangdo Athiabari kaba jngai kumba laiphew hynñiew kilomitar, ki nongïalam bad ki dkhot jong ka Hynñiewtrep Youth Council Mawshynrut circle, ki la hiar ban jurip bad ki la lap ba ka jingsiang rong ïa katei ka surok kam biang satia.
Hadien ba ki la lap ba ki don shibun ki jingduna, ki nongïalam ka seng ki la leit ban ïakynduh ïa u Sub Divissional Officer ka PWD ha ophis treikam jong u ha Riangdo, ha kaba ki la aiti ruh da ka jingthoh ban kyrpad ïa utei u ophisar ba un shimkhia lem ha ka ban bthah ïa utei u kontraktor ,ba u dei ban pynbiang ïa ka jingtrei katkum ki kyndon ba la bthah da ka sorkar.
U bah Losbingwell Lyngkhoi President ka HYC Mawshynrut circle haba ïakren bad u nongthoh khubor hadien ba ki la mih na katei ka ophis, u la ong ba ka jingleit ïakynduh jong ki ïa utei u ophisar ka la long kaba sei soh, namar ba u la kular ba un sa pyntip bad bthah ïa utei u kontraktor ba u dei trei bniah bad un bud ruh katkum ki jingbthah khnag ba ka surok kan skhem.
U bah Lyngkhoi u la ong ruh ba ha katei ka sngi, ki la thmu ban leit ïakynduh ruh ïa u Executive Engineer, hynrei um shym don satia bad katkum ka jingïathuh jong u SDO, la ong ba ka jingbym pat wan trei jong u Executive Engineer haduh mynta, ka dei namar ba ym pat don la u jong u Engineer u ba peit ïa ka Mawshynrut Division bad la shu peit lang da u ba na Nongstoiñ.
Nalorkata la ong ba ka jingbym pat wan trei jong u, ka dei namar ba ka sorkar kam pat thung satia ïa ki nongtrei naduh ki chowkidar, ki peon, LDA, UDA bad baroh ki staff kiba dei ban trei hapoh ka ophis jong u Executive Engineer bad ïa kiba bun ki kam la hap ban pynkit ha u SDO, hynrei um lah satia namar ka kam kaba dei ban peit ma u ka bun haduh katta katta.
Utei u nongïalam ka seng u la pynpaw ruh ïa ka jingsngewkhia namar ba ha u snem ba la dep u bah Prestone Tynsong Symbud Myntri Rangbah, haba u wan ban plie ïa katei ka ophis u la kular ba ha u bnai Kyllalyngkot, u EE ba pura un don noh ha katei ka ophis ban pyndep ïa baroh ki kam kiba u dei ban trei.
Hynrei, haduh mynta wat tang uwei u staff ha katei ka ophis ruh ym pat thung. Ka seng ka kyntu ïa ka sorkar ba ka dei ban pynkloi noh ban thung ïa ki nongtrei ha katei ka ophis, khnang ba ki kam kin ïaid beit ïaid ryntih bad kin ym sahteng.
