Shillong, Ïaiong 21 : Ka jingkyrduh um ha ka jylla kynthup naduh nongbah Shillong bad ruh ha ki bynta jong ka rilum Garo ka la dei kawei na ki mat ba ka sorkar ka kynduh mynta hadien ba ka jingshit kyrang ka sngi ka la neh la katto katne sngi mynta.
Katkum ka jingïathuh da u Myntri ka tnad Public Health Engineering (PHE) Marcuise N Marak, la ong ba ka daw tynrai jong ka jingkyrduh um hi kadei na ka jingthut ka bording. “Na ka liang ka tnad ka la pyrshang borbah ban pynbiang kham kloi,” u la ong.
U Myntri u la pynpaw ruh ïa ka jingsngewkhia halor ka jingnang tyrkhong ki tyllong um na ka daw ka jingkylla jong ka mariang. Halor kane, u la ong ruh ba ka tnad ka la pyrshang ban pynneh bad ïada ïa kito ki tyllong um kiba don kylleng.
“Ka sorkar ka la shim ruh ki lad ki lynti kumno ban pynneh ïa ki tyllong um bad ki sawdong sawkun jong ka lyngba ka jingkyrshan pisa da ka Asian Development Bank. Ngi la sdang ruh ban tei ia ki check-dam bad ki jaka pynlang um khnang ban ïoh pynneh ïa ka um ha ka ramew,” u la ong.
U Myntri u la ïathuh ruh ba ka la don ruh ka jingjia ha rilum Garo ba kawei na ki tyllong um ka la tyrkhong noh wat hadien ba ki la dep ban shna pyndep ïa ki kor ki bor ban pynpoi um sha ki paidbah.
“Kumta kam long satia kaba lah na ka liang ka sorkar ban pynpoi um ha kito ki jaka ba ki tyllong um ki la tyrkhong. Nga kwah ruh ban kyrpad ïa ki paidbah ba kin ïai shah lang bad ngi na bynta katto katne por khnang ba tang shu poi ka Lyiur baroh kitei ki jaka pynlang kin sa lang um biang,” u la ong.
Haba kren pat halor ka jingpynlang ïa ka umslap, u Myntri u la ong ba kadei ka jingai jingmut jong u shimet ba ki paidbah ki dei ban pyrshang hi ha ki ïing ki sem jong ki hi namar katei kan ïarap ïa ki hi.
“Nga kyntu ïa ki paidbah ha ka por ba ki shna ïing kidei ban pyrkhat ruh kumno ban ïoh tan ïa ka um slap namar kane kan ïarap ym tang ïa ki hynrei ïa ka sorkar bad wat ïa ka mariang ruh.”
