Ba shah thok ha ki trai ka MSKF, ujor ki kmie ki kpa jong ki khynnah lehkai

Shillong, Naitung 10: Ki kmie ki kpa jong ki khynnah ïalehkai Karate na ka synjuk Meghalaya State Karate-Do Federation (MSKF) kaba don ha Laitkor Kynton-u-mon, hynne ka Sngi Balang ki la wan shakhmat ban ujor pyrshah ïa ka jingshim kabu ki trai jong katei ka shlem ai jinghijai – u Bah Donny Ranee lem bad ka tnga jong u, ka Kong Anita Songthiang. Haba ïakren sha ki lad pathai khubor, na ka liang jong ki kmie ki kpa ki la phla ba kane ka synjuk lyngba ka Club Secretary- ka Kong Bajoplin Kharmudai bad ka Kong Anita Songthiang ki la btah ïa ki kmie ki kpa jong ki nongïalehkai ba ki dei ban siew 10% na ka cash award ba ki khynnah ki ïohpdiang na ka Sorkar bad kumjuh ruh 500 tyngka man u bnai na ka Scholarship nalor ka bai coaching kaba long 500 tyngka man u bnai.
Ki la ïathuh ruh ba ki la don katto katne ki kmie ki kpa kiba la pyndep ban siew haduh10,000/- katkum ka 10% na ka“cash award hynrei khlem da ai kano kano ka resit ban pynshisha hynrei ka la shu thoh ha ka kot sada kaba ki la ong ban kyntiew hapoh ka register jong ka synjuk, katba kiwei pat ki bym pat lah ban siew la shah beh noh na katei ka Club ha ka Kong Anita Songthiang ryngkat da kaba byrngem ban nym soi ïa ka scholarship bad ïa ka Cash Award, nalor kata kin nym lah ban dang ïalehkai.
Kine ki kmie ki kpa ki la ïathuh ruh ba ka Kong Anita Songthiang ka la bthah ba baroh ba ki dei ban pynbiang ïa ki Syrnot ïalehkai (Certificate) jong ki khynnah ha baroh ar ki kyrdan, kata ka State level bad ruh National level na ka bynta ka khusnam pisa lyngba kane ka Synjuk ban pynpoi sha ka tnad ïalehkai, ha kaba don napdeng jong ki kim shym la ïoh shuh ïa ki Syrnod ïalehkai National Level.
Kaba la nang pynsohsat bad pynlyngngoh ka long ba, katkum ka jubab ba ki kmie ki kpa ki la ïoh na ka Kong Anita Songthiang halor kine ki Certificate ki bym shym la pynphai haduh mynta, dei namar ba la kum buh bakla khlem da tip ïa jaka ba thikna, la ka dei ha Bhoi, War ne Jaintia ne sha ri Sepngi.
Yn tang kine hynrei ka la don ruh ka jingpyrshang leh thok ban pynïoh Syrnod takma ïa ki khynnah ïalehkai ki bym shym la jop ha ki jingïakhun. Katkum ka jingïathuh la ong ba ha ka National Kick-boxing Championship 2023 kaba la long ha Dehradun ha ka 01 tarik bad 3 tarik Risaw, 2023, ka synjuk ka la shu leh thok ban pynïoh ‘Syrnod takma Rupa’ khlem da ïoh khur takma ha ki jingïakhun.
Dang shen u Bah Donny Ranee u la bthah ïa ki khynnah ïalehkai kiba hap ha ka kyrdan sub junior ban leit ïashimbynta sha ka KIO All India Championship kaba long ha Dehradun ha ka 8 tarik u Jymmang, 2024 wat u la dep tip ba kam shym la don ka thup ïalehkai na bynta ki kyrdan sub-junior kumba la kdew ha ka Jingpyntip lane ka flyer. Dei tad ynda la poi ha Dehradun ba ki bor pynïaid ki la pyntip ba kam shym la don satia ka kyrdan ïalehkai na bynta ki khynnah sub-junior, bad kane ka ktah ïa ka pla tyngka jong ki khynnah ïalehkai.
Shuh shuh, ha kane ka Championship ka synjuk ka la phah mihkhmat da i Kong Bajoplin Kharmudai kum ka coach ka bym shym la pass kum ka coach. Ha kaba ïadei bad kane, la ïoh ban phah email sha u Bharat Sharma-President jong ka KIO All India Championship.
Ki la don ruh katto katne ki khynnah ïalehkai kiba la phah ban ïashimbynta sha ka KIO All India Championship kaba ha Dehradun ha ka 8 tarik Jymmang, 2024 hadien ba ki la dep ban siew na bynta ar tylli ki kyrdan ïalehkai (Game) kaba long haduh 16,500 tyngka sha u Bah Donny Ranee, hynrei ynda ki la poi sha Dehradun la shah ïa ki ban ïakhun tang ha kawei katba kiwei pat ki khynnah lehkai ka jylla ki ïoh ban ïashimbynta baroh ar.
Kaba pynlyngngoh bad pynsah umdum ïa ki kmie ki kpa, ka long ba ïa katei ka pisa kaba ki la siew na bynta ka jingïalehkai kaba ar ha Dehradun ka synjuk ka khlem pat shym la pynphai haduh mynta.