Ba pyrkhing ki kyndon ba pyntreikam ki shipai shem jingeh ban ioh jaka ia ki Kharmetor

Shillong, K’lyngkot 22 : U Myntri Rangbah ka Jylla Conrad K Sangma ha ka sngi Balang ula ong ba ka jingkyrpad jong ka Sorkar Jylla ban ai jaka lem na ki Shipai ha ka ban pynkynriah ïa ki 342 tylli ki longïing ka Them Metor na Them Iew Mawlong ka la ïa tyngkhuh ïa ki jingeh namar ka jingdon ki kyndon treikam ba pyrrkhing jong ki shipai.
Haba ïakren bad ki lad pathai khubor, u Conrad ula ong “Ki don katto katne ki jingeh hangtei. Lada phi kynmaw ngi la kyrpad ïa ka Defence Ministry ban ai katto katne ka jaka kaba ki longtrai lane ha u pud u sam jong ki bad ngi la ïoh ruh ïa ka jubab na ki heh shipai hynrei ki don katto katne ki kyndon treikam, kiba don ha ki manual jong ki shipai, kiba la buh ha ka jingeh ba kin ai ïa ka jaka. Kine ki kyndon kim dei kiba pyntreikam tang hangne ha jylla hynrei ha baroh kawei ka ri India”.
“Ki shipai ki don ia ki kyndon kiba pyrkhing bha ïa ki kam tei jingtei kiba lah ban mih ha syndah jong ki jaka shipai bad kine ki jingpyrrkhing kila wanrah ïa katto katne ka jingeh ïa ngi mynta” ula bynrap.
“Naba ngim lah ban ïakren pynkut lane shim rai ïa kane ka kam, ngam kwah ban ïakren eiei ïa mynta, ka kam ka dang ïaid, ngi dang ïakren bad ngi kyrmen ba ngin lap ïa ka lynti hynrei nga sngew ba ka dang kloi palat kumba nga ong ba ki kyndon jong ki shipai ki kyllaiñ bha bad ngi hap ban bud ïa kine ki kyndon bad ngin sa peit shano ngi ïapoi” ula ong.