Shillong, Lber, 18: Ka KSU Mawshbuit Unit ha ryngkat ka KSU Nongthymmai Circle ki la ai ka jingkyrshan ba pura ïa ka Dorbar Shnong Mawshbuit ba la lamkhmat da u Rangbah Shnong ban pyrshah ïa ka jingkren jong u Symbud Myntri Rangbah ka jylla uba khmih ïa ka tnat Kam Pohing Bah Prestone Tynsong uba ong ba 600 mitar ka surok na Them Basuk sha Mawshbuit ka hap ha ka jaka ki shipai Gorkha Training Centre (GTC).
U Bah Prestone u la pynpaw ïa kane haba jubab ïa ka jingkylli ba la wanrah da u MLA ka Mawryngkneng Constituency Bah Heavingstone Kharpran ha ka Dorbar Mang Tyngka ka ingdorbah Thawaiñ¨ ka Jylla kaba dang shu kut dang shen.
Ha u kyrwoh ba la phah sha ki lad pathai khubor ha ka Lah Sngi U Blei ka KSU ka la ong ba kan ai ïa ka kti kamon ka kti kadiang ïa ka Dorbar shnong bad kan ïai don ha syndah ban ïa pynbeit ïa kane ka kam kaba la pyndik ïa ki paid nongshong shnong jong ka shnong Mawshbuit bad ki para ri kiba ju ïaid lynti sha ka shnong Mawshbuit.
Ka KSU ka la ong shuh shuh ba kan ap ïa ka rai jong ka Dorbar shnong ban ïaid shakhmat halor kane ka phang.
Katba rai ka shnong ka KSU ka la long kaba la khreh la ka long ha miej ïakren ne ha madan ban ïakhun, la bynrap u kyrwoh na ka KSU.
