Nongpoh, K’lyngkot 12: Tang hadien ba ka Byrnihat ha Ri Bhoi District la pynbna katkum ka kaiphod jong ka Centre for Research on Energy and Clean Air (CREA) ba ka dei ka thaiñ ba ka lyer ka jaboh bha hapoh ka ri India, ka sorkar Meghalaya ka la shim khia ban tehlakam halor kane ka jingjaboh ka lyer ba ka Byrnihat ka la ioh ha ka kyrdan kaba nyngkong eh ha ka ri halor ka jingjaboh jong ka lyer, kaba lah ban ktah ïa ka koit ka khiah ki paidbah.
Ban shim khia halor kane ka bynta ban pynduna ïa ka jingjaboh ka lyer ha katei ka thaiñ ba bun ki Karkhana ha Ri Bhoi District, ka sorkar Meghalaya ka la thaw syndon da ka Committee kyrpang na ka bynta ban pyntreikam ïa ka National Clean Air Programme (NCAP) ban khlieh da u Deputy Commissioner ka Ri Bhoi na ka bynta ban ïa khun pyrshah ne pynduh halor kane ka jingiohnam halor ka jingjaboh bha ka lyer ha ka ri India baroh kawei.
Ka sorkar jylla haba shim khia ban ïakhun pyrshah na ka bynta ban pynduna ïa ka lyer jaboh ha Byrnihat ka la pynmih syndon da ka jingthoh kaba dei katkum ka Vide Notification No. Env.2/2018/436 Dtd. 07/09/2021, ban thung kyrpang ïa katei ka Committee na ka bynta ban pyntreikam ïa ka National Clean Air Programme kaba long ka thong ban pynduna ïa kata ka lyer jaboh ba la ioh nam ha ka kyrdan ba nyngkong hapoh jka ri India katkum ka kaiphod jong u snem 2023 lyngba ka Centre for Research on Energy and Clean Air (CREA).
Katkum ka kyrwoh ba la phah da ka sorkar jylla, haba pyntreikam ïa ka National Clan Air Programme kin sa pyntreikam ha ki bynta bapher bapher ban shim bynta lang na baroh ki liang khnang ban lah ban jop halor kane ka thong ban pynduna ïa katei ka jingjaboh jong ka lyer ha ka thaiñ Byrnihat.
La pynpaw ruh lyngba ka NCAP, ka sorkar kan shim nkhia ruh ban pyntreikam na ka bynta ban pynduna ïa ka lyer jaboh da kaba pynbha ïa ki surok ha ka thaiñ EPIP ba bun ki Karkhana, ban ïaleh ban pynjyrngam ïa katei ka thaiñ da kaba ïada ïa ka mei mariang bad ruh ban shim khia na ka bynta ban tehlakam ïa ki Karkhana kiba pynmih bun ïa la lyer jaboh.
Kaba kham kyrpang, ka sorkar haba pyntreikam ïa katei ka National Clean Air Programme, ka sorkar lyngba ka Committee kin sa pynlong ruh ïa ki prokram ïa jinghikai bapher bapher ïa ki paidbah ryngkat ki trai Karkhana bad kiwei kiwei ba ïa trei lang da ka bor sorkar na ka bynta ban pynduna ïa kata ka jingioh nam ka Byrnihat ba jur tam kata ka lyer jaboh hapoh ka ri India.
Shuh shuh, ka Meghalaya State Pollution Control Board kan sa shim khia ruh ban wad bniah bad ban thaw ïa ki lad ki lynti na ka bynta ban bishar bniah halor kane ka jingjaboh ka lyer kaba la ioh nam syndon ha ka ri India ba ka dei ka thaiñ ba jaboh bha ka lyer, ha kaba ha kane ka jingïakhun ban pynduna ïa ka lyer jaboh yn ïa treikam lang ruh naduh ka Center for Science & Industrial Research-National Environmental Engineering Research Institute (CSIR-NEERI) ban peit ban khmih halor kane ka jingmih ka lyer jaboh ha ka thaiñ Byrnihat.
