Hadien bun snem ka jingkhmih lynti, plie u Lat ïa ka Raj Bhavan ha Tura

Shillong, K’Lyngkot 12 : U Lat ka Jylla u Phagu Chauhan ha ka sngi Thohdieng u la plie paidbah ïa ka Raj Bhavan kaba dei ka projek kaba la khmih lynti la slem bha kaba don ha Tura ha West Garo Hills District.
Ha kane ka sngi la donlang ruh u Myntri Rangbah ka jylla, Conrad K Sangma, nangta u Lamphang ka Iing Dorbar, u Thomas A Sangma, ka MP na Tura ka Agatha Sangma kumjuh u Chief Secretary ka jylla, Bah DP Wahlang nalor kiwei kiwei ki heh sorkar kynthup ki bor pynïaid ka distrik.
Na ka liang u Lat haba kren ha ka jingïalang na kawei pat ka jaka (virtual mode), u la ong ba ka jingangnud bad ka jingkhmih lynti jong ki paidbah ka la urlong hadien ba la lah ban pyndep noh ïa katei ka Raj Bhavan ha Tura.
Da kaba ïaroh ïa baroh kiba donkti ban pyndep ïa katei ka projek, u Lat u la ong ruh ba ka jingtrei ïa ka Raj Bhavan, ka rilum Garo kan nang lah ban kiew arted ha ka roi ka pa bad ha baroh ki liang.
Haba ai nuksa ïa ki riewkhraw kum u Pa Togan Nenminja Sangma uba la aiti ïa la ka jingim na ka bynta ka bha ka miat jong ki paidbah jong u bad ka ri hi baroh kawei, u Lat u la kyntu ïa ki samla ka rilum Garo ba kin noh synñiang lang na ka bynta ka roi ka pa ha ka jylla khnang ban pynurlong ïa ka thong jong u Myntri Rangbahduh ka Ri, ka ‘Viksit Bharat Sankalp Yatra’.
Katei ka jingtei kaba la pynieng ha ka thain Danagre jong ka nongbah Tura la tei ha ka jinglut kaba kot sha ka 24.1 klur tyngka bad ka ieng ruh ha ka jaka kaba ïar haduh 28.45 akar. Ka jingpyndep ïa katei ka projek ka rah ruh ïa ka burom jong ka sorkar ban pynjan shuh shuh ïa ka synshar khadar sha ki paidbah khlem da pynleit jingmut beit tang ha ka nongbah.
Haba bynrap lang, u Myntri Rangbah ka jylla, Conrad K Sangma u la ong ba katei kadei ka projek kaba la slem bha kaba kane ka sorkar ka la lah ban pyndep. “Ka Raj Bhavan ka ieng ruh kum ka burom namar ka long ruh kum ka nongmuna na bynta ka lawei kaba phyrnai kaban sa wan. Ka long ruh ka jingsngew sarong ba ka President ka Ri, ka Draupadi Murmu kan sa sah ha kane ka complex ha ka jingwan jong shen shane,” u la ong.