Nongpoh, Risaw 21 : Da ka jingsngewkhia halor ka jingeh jingshon ki khynnah skul bad ki riew paidbah ha ka leit ka wan na ka daw ka jingsniew jong ka surok ha ki bynta jong ka shnong Umling, ka RBYF 20mer Circle hynnin ka sngi ka la mih ban maramot sngewbha ïa katei ka surok shi bynta ban pynsuk ïa ki khynnah skul bad ki paidbah ha ka leit ka wan.
Kane ka surok ba la mih ban maramot sngewbha da ka seng RBYF 20mer Circle ka dei ka surok ha Umling kaba leit sha ka skul St. Francis Higher Secondary School, Umling bad ka skul sorkar kaba don ha ka shnong Umling ha Ri Bhoi District.
Haba leit ban maramot ïa katei ka surok la ïalam da u Presdient ka RBYF 20mer Circle, u Bah Lan Syngkli, u Vice President, u Bah Peter Syngkli, u General Secretary, u Bah Seibor Nongmalieh bad kynthup kiwie kiwei ki nongïalam bad ki dkhot ka seng na 20mer Circle.
Kumba la pynpaw da kitei ki nongïalam ka RBYF 20mer Circle, ka daw kaba la pynlong ïa ki ban leit maramot ïa katei ka surok ka dei namar jingsniew palat ka surok ba bun ki kmie ki kpa jong ki khynnah skul bad ki riew paidbah ki la ud la nam ba ki shem jynjar ban leit ban wan na ka daw ka jingsiew jong katei ka surok.
Ki la pynpaw ruh ba kane ka jingmaramot jong ki ïa katei ka surok, ka long ruh kum ka jingpyni paidbah ïa ka jingtylli hapdeng ki para dkhot ka seng bad kito kiba long kloi ban ïa kit lem ïa ka eh ka shon ki paidbah bad ka jingmaramot ïa kane ka surok kan pynsuk ïa ki paidbah ha ka leit ka wan ha kaba kumba long mynta kane ka jingsniew ka surok ka la ktah shisha ïa ki paidbah ha ka leit ka wan.
Shuh shuh, kitei ki nongïalam ka RBYF ki la kyntu ruh ïa ka tnad PWD, ki nongmihkhmat bad wat ka sorkar ba kin thaw lem ïa ki lad ban pynbha ïa katei ka surok, bad lada ka sorkar ka shim khia ban pynbha ïakane ka surok ka long ka jingkyrkhu ïa ki khynnah skul bad kumjuh ruh ïa ki riew paidbah, ki la bynrap.
