Ba la shoh khawiang da ka wait ot doh mait u tnga ïa ka tnga, ka kiaw bad para kynsi ha Shaid Shaid Umoit

Mawkyrwat, ‘Naitung 15: Kawei ka jingjia kaba la jia ha ka sngi thohdieng jong ka taïew ka 12/07/2024 uwei u briew ha ka jingshoh khawïang u la shim da ka wait to-do bad mait naphang ïa la ka tnga, ka kiaw kurim bad ïa ka para kynsi kiba na ka shnong Shaid Shaid Umoit, South West Khasi Hills District.
Ha ka tyllong khubor na ki pulit la ong ba kane ka jingjia ka la jia ha ka 12/7/24 ha ka por kumba 10:30 mynmiet haduh 11 mynmiet ha kaba uwei briew uba kyrteng u Comingstar Lyngdoh Nonglait, 29 snem karta na ka shnong Shaid Shaid Umoit, South West Khasi Hills District uba don ha ka jingdih buaid ula thombor ïa la ka tnga ka kong Ribahun Kharwar (23), ka kmie tymmen jong u ka Ridalin Kharwar (43) bad ka para kynsi jong u ka Wandashisha Kharwar (19) bad baroh kine ki dei na ka shnong Shaid Shaid Umoit ryngkat bad thombor ïa ki ha ka jaka sah jong ki hi.
Shuh shuh la ong ba ha kane ka jingjia kine baroh lai ngut ki la mynsaw jur bad la pynkit ïa ki sha Civil Hospital Mawkyrwat ha ka 108 bad hadien la phah sha Civil Hospital Shillong.
U runar uba la tip kyrteng u Comingstar Lyngdoh Nonglait la ong ba ula leit pyndem ïa lade ha Mawkyrwat Police Station ha ka 13/07/24 mynstep bad ha kajuh ka por la ong ba halor kane ka jingjia la dep ban register case pyrshah ïa u katkum ki kyndon aiñ ba la buh.