Ba jyllei ka jingkam jait Khasi da ka affidavit, ïeng pyrshah ki Rangbah Kur

Shillong, Nailar 24 : Ka Synjuk ki Rangbah Kur ka Bri u Hynñiewtrep ka la ieng pyrshah ia ka jingnang jyllei kiba pynkylla jait Khasi tang da kaba shu leh da ka Affidavit.
Ïa kane la pynpaw da u Bah Erwin K Sutnga dkhot jong ka Synjuk bad ruh u nongïasaid aiñ hadien ka jingkynduh ïa u Chief Executive Member ka KHADC, Bah Pyniaid Sing Syiem ban ïa syllok halor ka jingshah pynphai biang ka Clan Administration Bill ba mynjur da ka KHADC dang shen.
Haba kren bad ki lad pathai khubor hadien ba la dep ka jingïakynduh, u Bah Erwin u la ong ruh ban ïada na ka jingshim jait pathar jong ki briew ki bym dei ki khun Khasi lyngba ki affidavit donkam ban pyntreikam thikna bad pura ia ka Khasi Hills Autonomous District Khasi Social Custom of Lineage Act, 1997.
U la ong ba la kylla aiñ sa ka Clan Administration Bill, kan pynkhlaiñ shuh shuh ha kaba ïadei ban teh lakam ïa ka jingshim jait pathar jong ki briew ki bym dei Khasi bad ha ka rukom synshar bad pynïaid ïa ka Kur ka Jait ha baroh kawei ka Bri Hynniewtrep.
La ïathuh ruh ba kum ka Synjuk ka la kyntu ïa u CEM ban tuklar mardor ïa kane ka jingshim jait pathar da kaba pyntreikam pura ïa ka Lineage Act, 1997. U la ïathuh ba na liang u CEM ruh u la pynpaw ba ka long kaba donkam ban leh eiei noh halor jong kane ka jingshim kabu jong ki bym dei Khasi.
Hadien kane haba ïa kren pat bad u CEM u la ïathuh ba ki la don haduh kumba 3500 tylli ki Kur ki Jait Khasi, bad pynpaw ruh ba haduh mynta kam pat don satia ka aiñ ban nang pynkhlaiñ shuh shuh ïa ka jingtreikam hapoh ka long kur long jait.
U la ong ba na liang ka KHADC da ka jingïatrei lang jong baroh ki MDC ka la wanrah ruh ïa ka Clan Administration Bill, 2022, hynrei kane ka Bill ka shah pynphai noh ban bishar biang ha ka tnat aiñ jong ka Jylla bad ka tnat DCA. Halor kane ka jingshah pynphai noh jong ka Clan Bill la ïakren ruh bad ka Synjuk jong ki Rangbah Kur ka Bri Hynniewtrep ban pynbit pynbiang.
Ha kawei ka liang u CEM u la pyntip ba katba ym pat long aiñ ka Clan Administration Bill, 2022, ka KHADC kan pynmih ïa ka jingpynbna ba ki Kur kiba la don ïa ki seng Kur kin pyntip bad pynrung kyrteng noh ka Council.