Shillong, Nailar, 24: Ka jingïakynad hapdeng ki Pnar bad ki Karbi ka la jan pynkylla thma ha ka sngi Palei hapdeng kine ki ar jaidbynriew ha ka shnong Lapangngap, West Jaiñtia Hills District.
U Waheh Shnong jong ka shnong Lapangap u Bah Deimonmi Lyngdoh u la ïathuh ba ka Dorbar Shnong Lapangap ka la thung ïa ki tynrai dieng ha ka jaka ba la shah pynjulor ki tynrai dieng ha ki Karbi ha u Lum Moo Pyrdet Pynthor uba don ha ka shnong Lapangap.
“Ngi la rai da ka dorbar shnong ban thung ïa ki tynrai dieng ha une u lum khnang ban pynskhem ïa ka jinglong trai jong ngi ïa ki jaka ki puta,” u la ong.
Dang shen ki Karbi ki la pynjulor ïa ki hajar tylli ki tynrai dieng ba la thung ki nong Lapangap ha une u lum ha u bnai Naitung bad kumjuh ha u Nailar ba la ai da ka tnat Basin Development naduh u bnai Jylliew ban pynjyrngam ïa ki sawdong sawkun ki lum ki wah.
U Waheh Shnong u la ïathuh, katba ki paidbah ki dang pynleit jingmut ban thung ïa ki tynrai dieng hadien katto katne ki paidbah ki la ïohi ïa ka jingkiew ka tdem na ka liang ba buhai shnong da ki Karbi.
“Ngim tip ka tdem ka mih na ka ing ne nangno hynrei ki Karbi ki shu kynnoh ba la thang da ki paidbah jong ka shnong Lapangap. Kane ka dei tang ka jingkynnoh lamler ban pynthohbria ïa ngi da ka buit sianti jong ki,” u la ong.
Shuh shuh u la ïathuh ba ki Karbi ki la wanrah lang bad ki Pulit ka Jylla Assam. “Donbok ba ki don ki Pulit ka Saitsama Out Post kiba la ai jingïada ïa ngi, hynrei lym kumta kan mih ka jingïa umsnam,” u la ong.
