Nongpoh, Ïaïong, 24: U District Magistrate ka Ri-Bhoi District u la pynjari syndon da ka kyndon aiñ 223 jong ka Bharatiya Nyaya Sanhita, 2023 ban mana ïa baroh ki trok kit palat pud kiba ju ïaid lyngba ka surok Mawmaram-Nongthliew-Mawmih ban mih sha Mawlyndep haduh ba kawei ka jingkieng kaba don haka dong Mawshohroh jong ka shnong Umbir ka la or pait bad buh jingma ïa ka leit ka wan ki paidbah.
Ïa katei ka kyndon aiñ la pynjari ruh hadien ka jingtip bala ïoh lyngba ka jingthoh na u Chief Engineer, PWD (Roads), bad na u Executive Engineer, PWD (Roads), Mawphlang Division, ha kaba ki la don ki dak orpait ha katei ka jingkieng kaba hap hapoh ka jingpeit jong ka PWD (Roads), Umsning Division, namar katkum ka jingmang bad ka jingshna, kane ka jingkieng ka lah ban shah tang ki kali kiba hapoh 9 Metric Ton ka jingkhia.
Kane ka surok ka long kawei na ki surok kiba pynïasoh ïa ka West Khasi Hills bad Ri Bhoi District, ka dei ka surok kaba kham rit kaba la la mang ban pyndonkam tang ki kali rit hynrei ka jingïaid ki kali kit palat pud lyngba kane ka surok ka la wanrah pynban ïa ka jingduh ka surok bad khamtam katei ka jingkieng kaba la sdang ban orpait bad kane buh pynban ka jingma ïa ki paidbah.
U District Magistrate u la maham bad pynmih da ka hukum pyrshah ïa baroh ki kali heh khamtam kiba kit palat pud khamtam kiba tam ïa ka 9 ton ba kim dei ban ïaid lyngba ka surok Mawmaram-Nongthliew-Mawmih-Mawlyndep bad kino kino kiba pynkheiñ ïa katei ka hukum kin ngat haka kyndon aiin ngat haka kyndon aiñ 223 jong ka Bharatiya Nyaya Sanhita, 2023. La bthah ruh ïa ki bor pulit ka Ri-Bhoi, ka tnad PWD (Roads) bad District Transport Officer jong ka Ri Bhoi District, ban pyntrei kam ïa kane ka hukum.
