Ba ïa tyngkhuh ki eksam ha kajuh ka sngi dawa pynkynriah sngi ka HYC na u DC-EJHD

Khliehriat, Naitung 29 : Ki nongïalam bad ki dkhot jong ka Hynñiewtrep Youth Council East Jaiñtia Hills District, mynta ka sngi kila leit ban ïa kynduh ïa u Deputy Commissioner ka East Jaiñtia Hills District, u Shivansh Awasthi, IAS, ha kaba ki ka dawa ba dei ban pynkynriah noh shwa ïa ka sngi thoh Exam jong ki samla thep kam namar ba ki don ar tylli ki Exam kiba kin iakhun na ka bynta ka kam sorkar kiba ïa tyngkhuh ha ka juh ka sngi.
Na ka liang ki nongïalam ka HYC na East Jaiñtia Hills District ba kynthup u President, u bah Preios Pale.Secretary, u bah Arki Lamare . bad u wei pat u bah Aiti Sana, ki la pynpaw ba kine ki ar tylli ki Exam ialehkam ki dei jong ka National Ayush Mission Exam kaba la buh ban pynlong ha ka 3/8/2024 ha Jaiñtia Eastern College, Khliehriat, katkum ka Notification No. DM&HO/EJHD/Genl.NAM-461/2023-24/7883, dated 25/07/2024, kaba la pynmih da ka ophis District Medical and Health Officer (DMHO), Khliehriat.
Katba ka wei pat ka dei kaba yn pynlong da ka Director of Health Services (MI), Meghalaya, Shillong kaba yn sa pynlong ha nongbah Shillong ha kajuh hi ka tarik kata ha ka 3/8/2024., ka seng ka la ong ba kane ka jingiatyngkhuh sngi kala wan rah jingeh ïa ki samla wad kam wad jam jong ka District kiba donkam ban ialeh ïa ki exam kam bad kila pynpaw ruh ïa kane ka jingeh sha ki nongïalam jong ka seng HYC, ha kaba ka seng kala leit dalade ban iakynduh ïa u DC ka East Jaiñtia ban kyntu ïa u ban pynkynriah sngi noh ia ka Exam jong ka District, ha ka wei pat ka por.