Shillong, Naitung, 14: Ki Pulit jong ka Lumdiengjri Police Station ha ka sngi Thohdieng ki la khot hajir ïa u Working President jong ka Hynñiewtrep National Youth Movement (HNYM) u Bah Donlang Nongbri halor ka jingkren jong u ha ka jingïalang paidbah kaba la long ha ka 23 tarik Naiwieng 2022 ha ka shnong Mukroh, West Jaiñtia Hills District da kaba byrngem ban seng ïa ka kynhun lehnoh hapoh ka Jylla namar ka jingbitar ïa ka Sorkar Jylla ka bym shym la la shimkhia ïa ki jingjia ha ki shnong khappud kat haduh ba ka la wanrah ïa ka jingduhei jong ki mynsiem briew hadien ka jingshah siat ïap jong ki san ngut ki paidbah ka shnong Mukroh ha ki ktang suloi jong ki Pulit ka Jylla Assam.
Kane ka jingshah khot hajir jong u Bah Donlang Nongbri ka la jia hadien shitaiew tam ba u President jong kane ka seng u Bah Louis Dohtdong u la shah khot hajir ha ki Pulit jong ka Lumdiengjri Police Station halor ka jingkynnoh ba ka Secretariat ka dei ka krem ki mentuh.
Hadien ba la mih na thanat, u Bah Donlang ha ka jingïakren bad ki lad pathai khubor, u la kubur ba u la kren ïa kine ki kyntien ba u la byrngem ban seng da ka kynhun lehnoh namar ka jingbitar ïa ka Sorkar.
“Haoid, nga kynmaw ba nga la kren. Ka dei tang ka jingkren bitar ïa ka jingbym ler jong ka Sorkar Jylla bad ka tnad Pulit ban ai jingïada ïa ki paidbah kiba sah ha ki shnong khappud,” u la ong.
U Bah Louis Dohtdong haba bynrap, u la ong, ka Sorkar kam dei satia ban shu pynlut kai ïa ka por ban khot hajir ïa ki sengbhalang sha ki Police Station hynrei ka dei ban pyndep la ka kamram da kaba phah ïa ki Pulit ban ai jingïada ïa ki paidbah ha ki shnong khappud kiba mad ïa ki jingshah pyndik ba laiphew jait ha ki Pulit bad ha ki Karbi kiba sah ha ka Jylla Assam.
