Ba bun palat kiba pan tiket, yn kham slem ka NPP ban pyllait ia ka thup kyrteng ba dang sah ha KHADC
La pynbna sa 6 ngut ki kyrtong MDC ha JHADC
Shillong, Nohprah 23 : Ka National People’s Party ha ka sngi Nyngkong ka la pynbna sa 6 ngut ki kyrtong MDC kiban aireng ha kane ka elekshon MDC sha ka Jaintia Hills Autonomous District Council kaba la buh ban pynlong ha ka 21tarik u Rymphang jong u snem ban wan.
Kane ka thup kyrteng kaba ar na bynta ki constituency ha JHADC ka kynthup ïa u Remdorkupar Lyngdoh na Saphai, u Bah Warmanship Shadap na Mowkaiaw, Dr. Dashemlok Isniaw Kjam na Jowai North, Bah Krison Langstang na Sumer, Bah Aibor Hima Darnei na Saipung Nongkhlieh bad u Bah Daïapher Lamare na Narpuh constituency.
Ha ka kylla ba nyngkong ki kyrtong kiba la dep ban pynbna ki kynthup ïa u Bah Holando Lamin na War Central, Bah Het Pohthmi na War West, Bah Lakhon Dkhar na Amwi Khliehtyrshi, Bah Ailad Bhoi na Mukhla Ummulong, Bah Jesse Suïam na Moodymmai Nongkhroh, Bah Eneningstar Teron na Mynso Nongjngi, Bah Rudaioo Tang na Shilliang Myntang, Bah Aiborlang Shadap na Barato Mukroh, Bah Phasmon Dkhar na Musniang Rngad bad u Bah Hambertus Nongtdu na Sutnga-Nongkhlieh.
Nalorkine, ki kyrtong ki kynthup ruh ïa u Chief Executive Member (CEM) ba mynta u Bah Thombor Shiwat bad u Chairman u Bah Shankey Shangpung.
Kumba long mynta, ka NPP ka la dep ban pynbna haduh 26 ngut ki kyrtong na bynta ka JHADC bad tang 18ngut pat ha KHADC.
Na ka liang u Working President ka NPP, Bah Hamletson Dohling u la ïathuh ba na bynta ki kyrtong kiba dang sah na ka bynta ki constituency ha KHADC shen ka party kan sa pyllait noh.
La sngewthuh ba ka Party ka lah ban ym pynieng kyrtong haki katto katne ki constituency hadien ba ka la dep ban bishar bniah ïa ki kyrtong kiba pan tiket.
Katkum ka jingong jong u Working President, ka jingpynslem ban pynbna kyrtong ha KHADC kadei namar ka jingbun palat kiba pan tiket ha ki katto katne ki constituency hynrei la katta ruh ki pynpaw ba ki khmih lynti ba hapoh ka taiew ba ar u Kyllalyngkot, 2024 kin lah ba pynna lut noh.
“Ngi buh thong ba la kumno kumnoh hapoh ka 10tarik ngin lah ban pynbna lut noh ia ka thup kyrteng jong ki kyrtong kiba dang sah na bynta ka elekshon kaban long ha u snem ban wan,” ong u Bah Hamlet.