Ar tylli ki Degree College thymmai yn tei ka Sorkar ha East Jaiñtia bad ha West Khasi Hills

Shillong, K’ Lyngkot 24: U Myntri ka tnat pule puthi jong ka sorkar jylla u Rakkam A Sangma ha ka sngi Thohdieng u la pynbna ba ka sorkar ka la rai ban buh sa artylli ki degree college ba thymmai hapoh ka jylla hapoh kane ka snem pule ba mynta.
Haba kren sha ki lad pathai khubor u Sangma u la ong ba ïa kane ka jingtyrwa lah dep ban ai jingmynjur da ka ministry kaba dei peit ïa kane ka kam.
“Ïa kine ki artylli ki degree college bathymmai kin don ha East Jaiñtia Hills bad West Khasi Hills,” u la bynrap.
U Myntri u la pyntip ba ka tnat pule puthi ka la dep ruh ban pynmih ïa ka jingpynbna na ka bynta ka jingthung kam ïa palat 100 ngut ki nongtrei na ka bynta kine ki artylli ki degree college.
Haba kylli u Sangma u la ong ba ïa ka Patharkhmah degree college bad ka Rongjeng degree college yn sa sdang noh ha kane ka snem pule bad bynrap ruh ba ka Mawphlang Commerce bad Science college kan sdang ha kane ka snem pule.
Haba ong ba ka tnat pule puthi ka la mad ïa kiba bun ki jingeh ha kine ki 40-50 snem ba la leit, u Sangma u la ong, “Ngi dei ka jylla kaba don bun ki skul, bad ki nonghikai haba nujor bad kiwei pat ki jylla jong ka ri. Ngi don ruh bun ki kynhun jong ki nonghikai. Hynrei ngi duna pat ki jingtei, ki jaka pule ba biang hynrei hapoh ka jingïalam jong u Myntri Rangbah, ngi la sdang ban wanrah bun ki jingkylla. Ha kine ki san snem ba la leit ka sorkar MDA hapoh ka jingïalam jong u Myntri Rangbah ngi la tei ïa ki ïingskul kiba thymmai khamtam na ka bynta ki college, na ka bynta ki secondary school, na ka bynta ki primary school bad kiwei pat ki jaka pule pyntbit la kidei ki polytechnic bad ITI.”
Ha kajuh ka por u Myntri u la ong ba ka tnat kan sa pynmih ruh ïa ka jingpynbna mynta ne la shai na ka bynta ka jingthung kam hikai ha ki lower primary school kiba khmih bad pynïaid da ka sorkar.