Shillong, Risaw, 14: Ka ïew khappud ba pawnam, ka Hat Lyngkhat, kaba don ha khappud bad ka ri Bangladesh ka la shu khang khyrdep la ar snem kynthih naduh mynta naduh ba wan lynshop ka jingpang khlam Covid-19.
“U MLA jong ngi, Bah Prestone Tynsong um pat ju wan iuhkjat wat tang shisien ruh,” ong ki paidbah kiba sah Hat Lyngkhat.
Ka Hat Lyngkhat kaba hap ha Pynursla C&RD Block, East Khasi Hills Kistrict, ka dei ka ïew kaba ju long ka plïangja jong ki trai shnong ka shnong Lyngkhat shwa ban khang khyrdep mynba ka jylla Meghalaya ka la shah lynshop ha ka jingpang khlam Covid-19.
Ki paidbah ka shnong Lyngkhat ki dei kiba im ha ka rep ka riang bad ki ju pynkit shaïew ïa ki mar rep ban die na ka bynta ban pyndap ïa la ka ing ka sem.
Hynrei kaba pynlynngoh, wat hadien ba la plie lut ïa ki ïew ki hat hadien ba la duna bad hiar ka jingïabit ïa ka jingpang khlam Covid-19 pynban ka Sorkar MDA kam shym la shimkhia ban plie biang ïa kane ka ïew.
Ki nongdie dukan kiba im kamai jakpoh na kane ka Ïew ki don hapdeng ka jingdiaw mynsiem bad ki ïakynduh mawsiang namarba ki hap ban wad ïa ki lad ki lynti tang kumno ban pyndap ïa ka bam ka dih kaba manla ka sngi. Ki nongshong shnong ki ïathuh ba ki la kyrpad la bun sien ban plie noh ïa kane ka ïew kaba don ha khappud, hynrei haduh mynta ym don satia ba patiaw ïa kane ka jingud jingnam jong ki paidbah.
“Watla u Bah Prestone Tynsong u dei u Nongmihkhmat jong ka Pynursla Constituency hynrei um ju don por ban peit lem ïa kane ka jingeh bad ka khia ka shon jong ki paidbah,” la ong u Rangbah Shnong barim u Bah String Khongtiang.
“Ym dei tang ma nga marwei ba duhnong, baroh ngi duhnong. U kwah, u tympew uba ngi rep ki paidbah kim kotbor satia ban shu wai kali ha ka dor kaba rem ban leit kit shaduh ka ïew Pynursla. Ngi hap ban shu bret ei bad ki mar rep kiba ngi rep ki shu pyut kai. Ngim don lah shuh ban pynmih pisa khlem da don ïew,” ong uwei u nongshong ïew.
Ka Meghalaya Trinamool Congress ka la kynthoh ba ka long ka jinglehraiñ ïa ka Constituency jong u Symbud Myntri Rangbah. “Ka paw kumba ka jingud jingnam jong ki paidbah kam shym la poi satia sha ka ing paki dulan jong ka Sorkar MDA bad ki Myntri jong ka. Ki paidbah ka Jylla Meghalaya ki shu peitkai ïa phi, ïa ki jingleh bym hok jong phi yn ym ailad satia,” la kynthoh ka TMC.
