Ap ka Sorkar ïa ka kaiphod Magisterial Inquiry halor ka jingshah thombor ka ophis u CM ha Tura

Shillong, Nailar 02 : U Myntri Rangbah ka jylla, Conrad K Sangma ha ka sngi Balang u la ïathuh ba ka sorkar ka dang ap mynta ïa ka kaiphod na ka jingtohkit magistrate halor ka jingkulmar bad ka jingwan thombor jong ki paidbah ha CMO, Tura ha ka 24tarik u Naitung.
Haba kren bad ki lad pathai khubor hynne ka sngi, u Myntri Rangbah u la ïathuh ruh ba halor katei ka jingjia, ka sorkar ka la thung da ka jingtohkit halor katei ka jingwan thombor jong ki paidbah ha ka por bym poi pyrkhat.
“Ngin hap shwa ïa ka kaiphod tohkit bad hadien kane ngin sa lah ban shim rai (lada donkam da ka kynhun tohkit ba laitluid). Hynrei ïa mynta, ka magisterial inquiry ka dang ïaid bad kan ym shim por shuh ban ai ïa ka kaiphod,” u la ong.
Lah ban kdew hangne ba ki la don haduh kumba 47 ngut ei ei ki briew kiba la shah kem halor ka jingsuba donkti halor katei ka jingjia ha katei ka janmiet kaba la wanrah ïa ka jingmynsaw jong bun ngut bha ki pulit pahara katba u Myntri Rangbah u dang shong jingïalang bad ki nongmihkhmat na ki seng bapher bapher kynthup ïa ka ACHIK kiba la dawa ban pyntreikam da ka backlog policy bad ruh ïa ka winter capital ha Tura.
Shuh shuh u Myntri Rangbah u la ong ruh ba kano kano kaba ki leh kadei beit katkum ki sakhi ba ki don.