Khliehriat naitung 29: Ka kynhun ki trai bad nongñiah trok kiba la mih noh na ka MCTODA, hynne ka sngi ka la thaw thymmai da kawei pat ka seng ne ka kynhun kaba la tip da ka All Meghalaya Truck Owners & Drivers Welfare Association (AMTO&DWA) hapoh ka jingïalam u Bah Wanshwa Nongtdu kum u President bad u Wellstar Warlarpih kum u General Secretary lem bad kiwei pat.
Ha ka jingïalang kaba la long hynne ka sngi Balang ha Hynñiewmer, West Jaiñtia Hills district, ka AMTO&DWA ka la jied shuh shuh ïa ki nongkitkam bad ki dkhot.
Katkum ka jingong u General Secretary, kane ka rai ka la mih na kiba bun balang namar ba kim kwah ba ki nongïalam kin ieh noh ïa ki ha ki jingdonkam.
U Nongaiktien jongka AMTO&DWA u MLA/MDC barim, u Bah Robinus Syngkon u la ong ba ka jingthmu bad ka kam ba hakhmat eh jong kane ka association ka long ban ïakhun na ka bynta ka kamai kajih ki trok jong ki trai Jylla ba kin ïoh kit ïa ki mar na ki karkhana dewbilat kiba don ha ka Jylla, kawei ka mat ka long ban buddien ïa ka hukum ba la pynmih da ka supreme court ban don ki Layby ne ki surok harud ki surokbah (National Highway) khnang ba kan don ka jingshngaiñ ïa ki trok bad ïa kiwei ki kali ba leit ba wan, bad ka mat kaba lai kaba kane ka kynhun ka la buh ka long ban ïakren bad bad baroh ki nongkhaïi ban kyntu ba kim dei ban leh katba mon ban ai kamai tang ïa ki briew jong ki, hynrei kidei ban pyrkhat lem na ka bynta ki trai Jylla.
U Bah Wanshwa Nongtdu uba dei u President u la ong ba ka jingbuh ïa ka ktien Welfare Association ka long ban ïarap lem ïa ki trai bad nongñiah trok haba ki ïakynduh ïa ki jingeh ne jingjia ba sngewsih, la ka long ha ka leit ka wan ba ki don ha ka kam bad kumjuh ban kyrshan na ka bynta ka bit ka biang lang ki para ba ïa kamai.
