Aiti u Bah Teibor Pathaw ïa ka ‘work order’ ba 1 klur sha ka shnong Nongkwar

0

Shillong, Risaw : U Bah Teiborlang Pathaw MDC ka Mawlai hynne ka sngi Balang u la aiti ïa ka Work order kaba 1 klur tyngka sha u Rangbah Shnong ka Mawlai Nongkwar u bah Moonstar Rumnong na ka bynta ban pynitynnad bad pynbhabriew ïa ka Bishop bad Bidon falls Viewpoint kaba ju ïa khot ruh kum ka Sonapani kaba don ha Mawlai Nongkwar.
Haba ai jingkren ha kane ka sngi ha ka jingïalang ba la pynlong ha jaka shong jong ki nongjngohkai kaba dei ruh ka viewpoint ha Sonapani u bah Teiborlang u la pynpaw ka jingkmen ban ïoh ban ai ïa kane ka work order kaba 1 klur tyngka na ka bynta ban pynitynnat ïa ki sawdong sawkun kane ka jaka jngohkai pyrthei kaba don hapoh shnong Mawlai Nongkwar bad kane ka jaka kan pynmyntoi bha ïa ka shnong ha kiba bun ki liang.
Ha kane ka sngi la ïoh ruh ïa ka jingkren na u Deputy Rangbah shnong u bah Ban L. Nongbri uba la pynpaw ba ïa kane ka viewpoint la shu iehnoh shrah la slem bha namar bym don ki nongmihkhmat kiba kitkhia bad kane ka jaka ka la shu long ka jaka leh ïa ki kam bym man bad ki kam sniew bapher bapher.
“Tad haduh ban da wan da u Bah Teiborlang Pathaw uba la wad ki lad ki lynti da ka jingtrei shitom ban jingstad ba ula lah ban wanrah syndon da ka skhim na District Council kaba kot haduh Shi Klur tyngka ban pynitynnad ïa kane ka jaka,” ong u deputy rangbah shnong bad u la bynrap, “Kane ka dei ka skhim kaba heh duh ba ka shnong jong ngi ka ïoh haduh mynta.”
U Deputy Rangbah shnong u la pynpaw ruh ka jingsngewnguh ïa u Bah Teiborlang Pathaw bad kyrmen ba ki paidbah kin kyntiew kyrdan noh ïa u ha u 2023.
Ha kane ka sngi nalor u rangbah shnong la ïa don lang ruh ki rangbah dong bad kiwei ki nongkitkam jong ka dorbar shnong Mawlai Nongkwar.

Leave A Reply

Your email address will not be published.