Shillong, Jymmang 23 : U MDC ka BJP na Tura, u Bernard Marak u la kyrshan ia ka jingdawa jong u President ka BJP, u Bah Earnest Mawrie ban pynlong da ka jingtohkit CBI halor ki jingjia kiba la pynkhihwin ha kine ki khyndiat sngi ha ka jylla.
Utei u MDC u uba dei ruh u Vice President ong ka BJP u la ong ba u nud ruh ban dawa ba u Myntri Rangbah ka Jylla Conrad K Sangma ban phah tohkit CBI lane ba un hiar noh na ka shuki Myntri Rangbah.
Utei u MDC u ong ruh ba ka jingthung ia u Conrad kum u Myntri Rangbah kadei namar ki khmih lynti ba kin ioh ia ka jingsynshar kaba bha bad kaba lait na ki kam bamsap. “Hynrei u Myntri Rangbah u la pyni da ki kam bad um shym lah satia ban trei katkum ka jingangnud jong ki paidbah. Baroh ki la bynñiaw lut namar kiba nang duk ki nang duk bad nang tlot kynthup ki samla kiba shu sakma khlem kam khlemjam,” u la kynthoh shuh shuh.
Na ka liang u Bernard u ong ruh ba ki kwah ba ki nongialam na Delhi ba kin wan ban tuklar bad leh post mortem ia baroh ki kam pynroi ha ka jylla ha shwa ban dier noh ka por.
La kynnoh ruh ba ka BJP ka pyllait bun bha ka pisa hynrei kaba bun la myntoi bad iohnong tang da ki kontraktor bad kiba treikam lang katba ki paidbah ki la sah ha ka tyrkhong.
Kawei pat ka bynta kaba utei u MDC u ong ka long ba ka por ka la dei ba u Conrad un pynshai halor ki jingkynnoh kumba la kdew da ki nongialam BJP haba iadei bad ka Ishu dewiong ne bording ha shwa ba ki heh nongialam na Delhi kin pynkut noh ia ka jingiadei bad ka NPP.
“Ngi ap sa tang ka jingbit na ki bor bahalor jong ka BJP ha shwa ban pynkut noh ia ka jingiadei bad ka NPP. Donkam ka tohkit CBI ban sei pyrthei halor kitei ki kam,” u la bynrap shuh shuh.
U ong ruh ba ka BJP kum ka party kadei ban mih shakhmat ban ïalam ia ki party ba donlang ha ka MDA ban weng noh ia u Conrad namar um lah ban iakhun ia ka bamsap.
U ong ruh ba ka BJP kan leit kylleng ban dawa ban bujli noh da uwei ha jaka jong u.
