Shillong, K’ Lyngkot 30: Ka sorkar jylla ka la rai ban pynkynriah ne rah noh ïa ka jingpyntreikam jong ka Swachh Bharat Mission Gramin Plus (SBMGP) napoh ka tnat Public Health Engineering (PHE) bad aiti noh sha ka tnat Community and Rural Development (C&RD).
Ïa kane ka rai la mynjur da ka kynhun Myntri ba la pynïaid da u Myntri Rangbah ka jylla u Conrad K Sangma ha ka sngi Palei.
Haba kren sha ki lad pathai khubor hadien ka jingïalang, u Sangma u la ong, “Na ka daw ki jingeh ba la mad da ka tnat PHE namar ba kadei ruh kaba pyntreikam ïa ka Jal Jeevan Mission bad kumjuh ruh ka jingduna ki nongtrei ban pyntreikam ïa ka SBMGP, la shim ïa ka rai mynta ka sngi da ka kynhun Myntri ban pynkynriah ne rah noh ïa ka jingpyntreikam ïa ka SBMGP na ka PHE sha ka tnat C&RD.”
Haba ïathuh ba ki don lai tylli ki daw ba la shim ïa kane ka rai, u Myntri Rangbah u la ong, “Kawei ka dei ba ka tnat C&RD ka duna ki nongtrei naduh ka tynrai ban pyntrei ïa kane ka project. Kaba ar bun ki jylla ha ka ri ki la leh bad wat mynta na kajuh ka daw ba ka tnat C&RD jong ki jylla bapher bapher ki don ki tiar kiba donkam bad ka jingdon ki nongtrei na ka bynta ban pyntrei ïa ka SBMGP kaba long ruh ha ka rukom kaba sted bad da ka rukom kaba kham biang bad kaba lai pat kadei ba ha ka jingïalang kaba la long danshen bad ka Jal Shakti ministry, u Myntri, u secretary bad ki ophisar jong ka sorkar pdeng ki la ai jingmut ïa ka sorkar jylla ban rah ne pynkynriah noh ïa kane ka jingpyntreikam napoh ka tnat PHE sha ka tnat C&RD.”
