Nongpoh, Risaw 28: Hadien ba ka Western Ri Bhoi Dorbar Social Welfare Organization kum kawei na ka kynhun ki riew rangbah ba trei na ka bynta ka bha ka miat ki paidbahg ha Western Ri Bhoi dang shen ka la ïoh da ki nongïalam ba thymmai, u MLA ka Jirang, u Bah Sosthenes Sohtun ym tang ba u la leit ban ïa kynduh ïa kine ki nongïalam ba thymmai ban ïa kren halor ki kam pynroi, hynrei kum u nongmihkhmat paidbah u la leit ruh ban ai ka jingkyrkhu kyrdoh ïa kine ki nongïalam ba thymmai ba kin shim ïa kata ka jingkitkhlieh ban ïa trei lang na ka bynta ban kyntiew ïa ka dong bad ka thaiñ jong ka Ri Bhoi Sepngi.
Na ka liang une u MLA ha ka sngi Thohdieng u la leit ban ïa kynduh ïa kine ki nongïalam ba thymmai ka Western Ri Bhoi Dorbar and Social Welfare Organization da kaba pynlong ïa ka jingïakynduh lang ha Western Ri Bhoi Dorbar Hall, ba la ïa don lang naduh u MDC, u Bah Victor Rani, u president bad secretary katei ka Western Ri Bhoi Dorbar, ba kynthup ïa u Bah Eniasroy Rani bad u Bah Lamgiskar Wahlang bad kynthup ruh naduh ki Sordar Shnong bad ki riew rangbah jong ka thaiñ Western Ri Bhoi.
Ha kane ka sngi, u MLA ka Jirang, u Bah Sosthenes Sohtun u la ïa kynduh ïa kitei ki nongïalam ym tang ban ai ka jingkyrkhu kyrduh bad ka mynsiem jong ka jingïatrei lang hapoh katei ka thaiñ, hynrei ki la ïa kren ruh halor shibun ki phang kiba dei na ka bynta ka roi ka par bad ka bha ka miat jong ki paidbah ka thaiñ Western Ri Bhoi.
U MLA ha kane ka sngi, u la aiti ruh da ki shuki sha ki nongïalam ka Western Ri Bhoi Dorbar and Social Welfare Organization kum kawei na ka jingdonkam hapoh ka Dorbar Hall.
Lyngba jong kane ka sngi, ka Western Ri Bhoi Dorbar and Social Welfare Organization ka la shim ruh ïa ka kabu ban aiti ïa ka dorkhas ha u MLA kiba de halor ki jingdonkam ki paidbah kaba ki la pynsngew ban kyrpad na u MLA ban shim khia na ka bynta ban ïa kren halor ka jingdonkam ban treikam pura ka Civil Sub Division ban myntoi ki paidbah.
Kiwei kiwei ki mat ba la pynsgnew ki kynthup ïa ka jingdonkam ban ïoh noh ïa ka 33kv Power sub station ha Patharkhmah ban pynbiang bording ïa ki paidbah, ka jingdonkam ban ïoh ïa ka jingker ha ka ophis ka Western Ri Bhoi Dorbar, ka jingdonkam ban plie paidbah noh ïa ka Model Degree College nalor kiwei kiwei ki mat ba la pynsngew sha u MLA ba un shim khia ban ïa krens ha ka sorkar jylla.
Haba kren ruh ha kane ka sngi kum u nongmihkhmat paidbah, u Bah Sosthenes Sohtun, nalor ka jingkyrkhu kyrdoh kiba u la ai sha kine ki nongïalam ba thymmai ka Western Ri Bhoi Dorbar and Social Welfare Organization, u la kular ruh ban shim khia halor kitei ki mat ba ki la pynsngew ïa u kum u nongmihkhmat ban ïa kren sha ka sorkar na ka bynta ka jingbit jingbiang bad ka jingkylla hapoh ka thaiñ Ri Bhoi Sepngi hi baroh kawei.
Shuh shuh, kum u MLA ne u nongmihkmat paidbah u la kyntu ruh ïa kine ki nongïalam ka Western Ri Bhoi Dorbar ba kin don lang kata ka jingkitkhlieh na ka bynta ka bha ka miat ki paidbah bad u la pynpaw ruh ba kan nym don kano kano ka jingeh lada kum ki nongïalam bad ki paidbah kin ai ïa kata ka jingïatrei lang na ka bynta ban kyntiew bad ban wan rah ïa kata ka jingkylla ha ka roi ka par ba kum ki paidbah ka thaiñ Ri Bhoi Sepngi ki donkam, u la bynrap.
