Shillong, April 9 : U Myntri Rangbah ka Jylla u Conrad K. Sangma ha ka sngi Baar, ula ïaroh ïa ka result SSLC jong ka MBoSE mynta u snem bad ula ong ba ka dei kawei na ki mawjam kiba kongsan ha ka jingïaid lynti jong ka pule puthi bad ong ruh ba ka dei ka khyllipmat kaba la wanrah ïa ka sngewhun mynsiem ha ka samoi treikam ka jongu.
Watla ym shym la treh ban kren eiei pyrshah ïa ki jingkynthoh halor ka jingbha jong ka result bad ka jingpyndonkam ïa ka CM Impact Guidebooks, u Conrad Sangma ula ong, ba ka sorkar ka ïengskhem ha ka nongrim ban wanrah ïa ka jingkylla ka ban ïaid jngai bad kaba don jingmut ha ka liang ka pule puthi, khamtam eh ha ki thaiñ nongkyndong.
“Ka result ka dei kaei kaei kaba nga da sngewkhia bha mynta la bun por bha” ong u Myntri Rangbah bad u ong, ba ka jingpynleit jingmut jong ka sorkar ka long ban shimkhia ïa ki jingeh naduh ki tyllong jong ka jingleit skul. Ki jingtuklar ki kynthup ïa ka jingai jinghikai ïa ki nonghikai bad ka jingai jingkyrshan kyrpang ïa ki district kiba la mad ïa ki ba bun ki jingeh.
Ha kaba ïadei bad ka CM Impact guidebooks, kaba la ïoh ïa ka jingïaroh bad jingkynthoh, u Conrad Sangma ula ïada tyngeh ïa kane ka buit treikam ba la pyntrei da ka tnad pule puthi.
“Ngi lah pyrshang bad khmih bniah ïa ki bynta na ki ‘Competitive Exams’ kum ka Civil Services, IIT, IIM, NEET bad GMAT. Ka jingmut ka long ban ïarap ïa ki khynnah pule ba kin sngewthuh ïa ki rukom buh ïa ki jingkylli bad ba kin don ruh ïa ka jingshaniah kaba skhem halade” ula pynshai.
Ula ong, ba kaei kaei kaba la mih na ka result SSLC ka dei kaei kaei kaba u sngewjan eh halade shimet. u Conrad ula ong, “Nga lah ong ïa ka kurim bad ïa ki paralok, kane ka dei kawei na kiba la pynhun mynsiem,ïa kaba nga la sakhi ha kine ki 7-8 snem. Mutdur ki khynnah pule uba pheil ha ka klas X, ka lah ban pynkut ïa ka jingangnud ka jongki. Kane kala pynkhuslai bha ïa nga”.
Na ka bynta kito kiba kynthoh, ula ong, “Nga ngam don eiei ban ong ïa kaei kaba ki briew ki kren pyrshah. Nga peit ïa ki kum ka jingmutdur ki khynnah rit hynrei nga sngewkmen pat ba ngi la lah ban wanrah ïa ka jingkylla”.
Haba pynshai ba ki guidebooks ki long tang kiba ïarap ha ka jingpynkhreh bad kam dei satia ka lynti lyngkot ban poi sha ka thong, ula ong “Kane ka dei tang ka kot ka ban ym lah ïa ki ban pynlong kum ki IAS ophisar. Ki hap ban trei shitom bha. Wat bad ki kot ruh, ka jingpule ka long kaba kongsan ryngkat bad ka jingtrei shitom”.
U Myntri Rangbah ula ai khublei ïa baroh ki khynnah pule kiba la pass ha ka eksamin. Ula kitbok ruh ïa kito ki bym shym la lah ban pass ïa katei ka eksamin, da kaba ong, “Kane kam dei kaba kut ïai bteng ban trei shitom”.
Haba pdiang ïa ka jingkiew jong ka jingangnud jong ki khynnah pule ban bteng ïa ki jingpule ha ki kyrdan kiba heh, u Conrad Sangma ula ong ba ka sorkar ka dang trei shitom ban pyniar ban pdiang ïa ki khynnah ha ki jaka pule ha ka kyrdan Higher Secondary. Ki jingïakren ki la ïaid shakhmat bad ka sorkar, ki jaka pule kiba la pynïaid da ki riewshimet bad ki jaka pule kiba ïoh jingkyrshan na ka sorkar ban sdang ban ai ïa ki jingpule ha ki ‘Stream’ bapher bapher bad ban shim bun ruh ïa ki khynnah pule.
Ula pynshlur ruh ïa ki khynnah pule da kaba ong, “Ngi baroh ngi kwah ban don ha ki jaka pule kiba pawkhmat bha hynrei kan ym don jaka lut na ka bynta baroh. Long kiba sngewthuh, aplai ha kylleng ki jaka pule bad wat nym iehnoh ïa ka jingpule”.
U Myntri Rangbah ula pynthikna ruh da kaba ong, “Ba kane ka dei tang ka jingsdang. Ngi ngin bteng ban trei shitom ban kham bha shuh shuh ha ki snem ki ban dang wan”.
