Ai khublei ka JSM ïa ka EC-JHADC ba ka la lah ban thaw ïa ka aiñ ban iada ïa ki kur
Khliehriat Jylliew 28: Ka Jaiñtia Students Movement (JSM), Central Executive Committee, ka ai khublei kyrpang ia ka Executive Committee jong ka Jaiñtia Hills Autonomous District Council ha ka jingialam u CEM Bah Thombor Shiwat, namar ba ka la pdiang ïa ka jingdawa ba la rah da ka seng lyngba ka dorkhas ha kaba ka seng ka la dawa na ka council ban thaw ia ka ‘Jaiñtia Hills Autonomous District (Registration & Protection of Clans) Act, 2026’ kaba katkum ka Para 3(1)(b) jong ka Sixth Schedule, ban iada ïa ka ‘Kur Tre Ri’ – ki Kur Tynrai kiba na ka kmie.
“Kane ka rai, kaba la pyntip lyngba ka shithi http://No.JHADC/POL/61/2025/17 dated 26/06/2026, ka wan hadien ba ka JSM ka la ai jingkyrshan pura ïa ka rai ba la shim da ka Dorbar Waheh Kur Ri Jaiñtia ha ka Annual General Meeting ba la pynlong myn ha ka 13/06/2026 ha Chilliangraij.
Katkum ka Article 244(2) ryngkat bad ka Para 3(1)(b) jong ka Sixth Schedule, ka JHADC ka don ka bor ban thaw aiñ halor ka jinghiar pateng lane ka “inheritance” bad “social customs”. Ki kam registration Kur, ka jinghiar pateng, ka bor ka Dorbar Kur bad ka jingiada ïa ka jaka pateng /akhrur ki hap beit hapoh kane ka bor” pynpaw ka JSM lyngba u kyrwoh.
U bah Heihokmi Supuh, uba dei u Publicity Secretary jong ka seng, u la ong ba ka Jaiñtia Students Movement ka kyntu ïa ka JHADC ba kan thaw noh ïa ka “Jaiñtia Hills Autonomous District (Registration & Protection of Clans) Act, 2026″ shuwa ban wanrah ïa ka Draft Bill hapoh ka Dorbar ban wan bad ba kan pynlong ïa ka jingialang iamir jingmut bad ki Waheh Kur bad ki Dorbar Tynrai haba thaw ia ka Bill, na ka liang ka seng ngi ai ka jingiroh ïa U CEM, u bah Thombor Shiwat bad ka EC baroh kawei kaba la pynpaw ïa ka jingskhem mynsiem bad shim ïa ka synjam ban iada ia ka riti, namar kane ka Ain kan iada kyrpang ia ka ‘Kur Tre Ri’ – ki Kur Tynrai na ka kmie bad kan pynkhlaiñ ïa ka Dorbar Kur, kan buh ïa ka bor u Rangbah Kur bad kan iada ïa ka kur Ankhur na ka bynta ki pateng ka ban wan” pynkut u kyrwoh.