Shillong, Ïaïong 06: Na ka liang ka Hynñiewtrep Youths’ Council-Seng Kmie, ka dap da ka jingsngew kmen ban ai Khublei Shad Suk Mynsiem ïa baroh ki para Ri, ki para kur ki para kha, ki para kher ki para mer. Ka Shad Suk Mynsiem ka don ïa ka dur ba maïan kaba pyni ïa ka dur ba pura jong ka Jaitbynriew u Hynñiewtrep ha kaba u Shynrang u shad tawiar kum u nongda nongker ïa la ka jong ka Longïng Longsem, Longkur Longjait bad ïa la ka jong ka Jaitbynriew. Hynrei ka kynthei pat kaba shad ha pdeng, ka dei ka nongri nongsumar ïa la ka jong ka kur ka jait, ka burom ka akor jong ka long rynïeng, ka longïng longsem bad ïa ka Riti ka Dustur jong ka Jaitbynriew.
Na ka liang ka seng ka la ong ba ai ba kane ka jingmut kaba la shon shap ha ka dur jong ka Shad Suk Mynsiem kan dang suhsieng ha ngi iwei pa iwei ba ngi dei ban kynmaw ban ïada bad pynneh pynsah ïa la ka jong ka Riti ka Dustur bad ka Niam ka Rukom jong ka Jaitbynriew.
“Ngi sngew ban ai Khublei ruh ïa ka Seng Khasi kaba la lah ban ïeng rangbah ban pynneh pynsah ïa kane ka Riti ka Dustur jong ka Jaitbynriew bad dei lyngba ka jingtrei borbah jong ka, ba ka Riti ka Dustur ka dang neh kumne kumba ka long. To u Blei Trai Kynrad un dang kyrkhu kyrdoh bad u dang pynshait bor ïa ngi baroh lang ban dang im tip briew tip Blei, tip kur tip kha bad kamai ïa ka Hok bad ba un dang ïai kyrsoi ruh ha ngi ïa ka jinglong tylli kum kawei ka Jaitbynriew,” ong ka kyrwoh na ka seng.
Shuh shuh na ka liang ka seng ka la ong, “Pansngiat theisotti ba janai ha Ri Khasi, Symphiah bad Thuïa ruh ki nguh baroh arti. Burom ka Ri kan neh tyrsem, la ka Riti ha ka Shad Suk Mynsiem,” pynkut ka kyrwoh na u Bah Roy Kupar Synrem President HYC-CEC.
