Jowai, Naitung, 05: Ka Khasi Students’ Union West Jaiñtia Hills District Unit (KSU-WJHDU), ka shim ïa kane ka kabu ban ai khublei Behdieñkhlam basuk ba kmen ïa baroh ki khun Niamtre jong ki Seiñraij Bapher bapher “To ai ba kane ka Behdieñkhlam ka long mynta u snem kan long kaba ïaid beit ïaid ryntih bad kan beh ïaka jingpang kiba bapher bapher jong kane ka phyrthei khamtam ban beh ïa ki jingpang khlam ba har rukom
Ka seng ka ngeit skhem lyngba kane ka Behdieñ-khlam kan teh song ïaka jaidbynriew ban don ka mynsiem ïatylli kum ka Jaidbynriew rit pait hapoh ka Bri u Hynñiewtrep Hyn-ñiewskum”.
Ka seng ka kitbok kitrwiang kyrpang ïa ki khun jong ki Seiñ Raij bapher bapher hapoh Ri-Lum Jaiñtia ba kin dang lah ban dang ïaid shakhmat ban pynneh pynsah ïa ka leh ñiam ka leh rukom bad ka Riti dustur kan im bad ka jaidbynriew jong ngi kan neh kan sah ha sla phyrthei. Ba U Blei u Trai kynrad Nongbuh Nongthaw un dang theh ia ki jingkyrkhu khyrdoh ban ïoh ïa ka koit ka khiah krad, ka kamai ba bha,ban kiew irat ha ka pule puthi ka pyrkhat pyrdaiñ ka ban kyntiew ïa ka Ri bad ka Jaitbynriew, pynkut ka kyrwoh ba la phah da u samla Juhhi Tariang, Publicity Secretary KSU WJHDU.
Ha kawei ka khubor bala phah da ka Hynñiewtrep Integrated Territorial Organization (HITO) West Jaiñtia Hills District lyngba u Publicity Secretary u samla Yomiki Passah ka ai Khublei Behdeiñkhlam basuk ba kmen ïa baroh ki Khun ka Seiñraij Jowai ka ban sdang naduh ka 6 tarik Naitung haduh 9 tarik naka liang ka Seng ka ai Khublei ïa baroh ki nongïalam ka Seiñraj kiba la prat lynti haka ban pyntyllun ïaka ñiam ka rukom kumba la suit la Shor daki long shwa manshwa ban pynneh pynsah ïaka ñiam tynrai.
La ong kum ki dkhot jong ka jait bynriew Hynñiewtrep sngewsarong ïaka ka jong ka tynrai kumba la saiñdur naduh hyndai hynthai, to ai baka Behdeiñkhlam 2023 kan wan rah ïa jingsuk jingkmen ka koit k khiah ka ïoh ka kot ïa baroh ki paradoh parasnam haka Seiñraij Jowai bad kumjuh ruh ïaka bri u Hynñiewtrep hi baroh kawei ïaka jinglong “tip briew tip Blei tip kur tip kha bad kamai ïa ka hok.”
Ka Seng Khihlang ka ai khublei Behdieñkhlam ba suk ba kmen ko ïa ka Seiñ Raij Jowai bad ïa baroh ki khun jong ka Seiñ Raij Jowai, ïa ka lehñiam Behdieñkhlam jong ka Seiñ Raij Jowai kan sdang naduh ka sngi 06/07/2023 bad kan kut ha ka sngi 09/07/2023, bad to ai ba hapoh kine ki ‘Saw Sngi lai miet’ kaba ngi khot ‘Soo sngi Le iaw’ kin long ki sngi kiba kyrpang bad kyntang ïa baroh ki khun ka Seiñ Raij bad kumjuh ruh ïa ki khun ka Niam Khasi.
Ka Seng Khihlang ka khmut lynti balyngba kane ka jingleh ñiam Behdieñkhlam, ba hadien kane ka lehñiam ka pang ka shitom ka khlam ka ngoh kan pher na kane ka Rilum ba kyntang, ba ka pang ka shitom kan duh kan dam Noh bad kan wanrah ïa ka imlang ka sahlang kaba shong suk shong saiñ hapoh ka Shnong ka thaw.
Kumta ha ka juh ka por ruh ka Seng Khihlang ka pynbna sha phi ki khun ka Bri u Hynñiewtrep Hynñiewskum Skum ba ka Lympung jong ka Sengkhihlang jong u snem 2024 Kan long ha ka Seiñ Raij Wahiajer West Jaiñtia Hills District ha ka tarik 19,20,21/04/2024. Kane ka long katkum ka jing pyllait khubor u ma S. Sari Publicity Secretary ka Sengkhihlang.
