Ai jingthoh u bah Hek sha Delhi ban pynkynriah noh ïa u VC ka NEHU ban wanphai ka jingjai jai

Shillong, Naiwieng 11: Ki samla pule kiba ïakhih shong shah tngan ha North Eastern Hill University (NEHU) ha ka sngi nyngkong ki la kyrpad bad dawa ïa ka President jong ka ri India ka Droupadi Murmu ban weng kam noh ïa u Vice Chancellor (VC) ka NEHU u Prof PS Shukla halor ka jingkynnoh ba u la pynpulom ïa kiba bun ki kam khamtam ha kane ka jingjia kaba la jia ha skulbah ha kine ki sngi. Nalor kane ki samla pule ki la ujor ruh halor ka jingjah rngai jongu na ka University wat hapdeng kine ki kynrum kynram ba jur.
Ha kajuh ka por na ka liang u Myntri ka sorkar jylla uba peit Veterinary bad Fisheries uba dei ruh u MLA ka BJP u bah AL Hek u la ai jingthoh mynta ka sngi sha ka sorkar pdeng ban weng noh ïa une u Vice Chancellor ka NEHU u Prof S Shukla khnang ba ka jingjai jai bad ka jingïaid beit ïaid ryntih kan wan phai biang ha ka Univeristy.
ïa kane ka shithi jingujor la phah lang da ka North Eastern Hill University Students’ Union (NEHUSU) bad ka Khasi Students’ Union (KSU – NEHU Unit), kiba la long ki nonglamkhmat ha kane ka jingïakhih shong shah thngan ha kine ki 7 sngi ba la leit.
Ha ka shithi ki la ïathuh ba une u VC ba mynta u la jah rngai napoh ka kam jong u wat hapdeng ka jingïakhih shong shah thngan jong ki samla pule hapoh kane ka skulbah.
“Ka la long mynta la 7 sngi bad kumba 146 kynta naduh ba la sdang ïa kane ka jingïakhih shong shah thngan, bad wat hapdeng kane ka jingïakhih kaba la jlan bha jong ki samla pule, na ka liang jong u VC u khlem lah ban shim ïa ki jingkit khlieh jong u. Ka jingjah rngai jong u VC, khlem ka jingpyntip, ka dei ka kam kaba sngewkhia bha ha kaba kane ka la pynphalang ïa ka jingdkoh jong u kum u nongïalam bad ki jingbym lah jong u ban pynbeit ïa kine ki jingeh,” ong ki samla pule da kaba bynrap, “Ha ka jaka ba un pynbeit ïa kine ki jingeh na ka liang u VC um shym la lah satia ban jubab bad ban don hapoh ka campus ban pynbeit ïa kine ki jingeh.”
“Halor kine kiei kiei na ka liang ki samla pule ki la sngew ba une u VC ba mynta um shym la long satia uba bit dor ban ïalam ïa kane ka skulbah. Kane ka jingbym lah ban treikam bha jong u, ka jingbym lah ban shim khia bad kumjuh ruh na ka bynta ka bha ka miat ki samla pule ka la lam sha ka jingdkoh ki jingïaid beit ki kam ki jam hapoh kane ka jaka pule. Ki Union namar kata ki kyrpad ba dei ban wengnoh ïa une u VC mardor naba um lah ban pyndep ïa la ki kamram jong u,” ong ki seng ha ka shithi sha ka President.
“Da kaba burom ngi kyrpad ïa phi ban shim kam noh mardor ban khmih ïa kine ki jingeh ba la mad da ka skulbah na ka bynta ka ba ka miat ki samla pule,” ki la bynrap ha ka shithi.
Shuh shuh na ka liang ka seng ki samla pule ki la ïathuh ba kane ka jingpynlong ïa ka jingïakhih shong shah thngan ka la ktah bha ïa ka koit ka khiah ki samla pule.
“Ba bun na ki samla pule ki la shah sumar ha ki hospital na ka daw jong ka jingtlot palat ka met, ba kynthup ïa ka jingduna ha ka blood pressure bad blood sugar. Ka jingbym don jong u VC, kaba kynthup ïa ka jingduna ha ka jingïakren haba ïadei bad kane ka jingkem pang ki samla pule, ka la pynlong ïa ki samla pule kiba ïakhih ba kin mad ïa ki jingeh kiba khraw. Ka jingbym lah jong u ban pynbeit ïa kine baroh ka la pyni ïa ka jingbym lah ban shimkhia jong une u VC ba mynta,” ki la ong ha ka shithi.
Na ka liang ki samla pule ki la ong ba ka eksam jong ki samla pule undergraduate ka la don hajan bha bad ka jingbym don jong u VC ka la pynlong thylli ïa ki rukom pynïaid kam pynïaid jam. Kam shym la don kano kano ka jingshim khia ban pynlong ïa kine ki eksam ha ka rukom kaba dei bad kaba ïaid beit ïaid ryntih, ha kaba kane ka la ktah bha ïa ki samla pule ym tang jong kane ka skulbah hynrei ïa kito ki samla pule kiba pule ha ki college kiba pynïasoh bad kane ka skulbah.
“Kane kam dei shuh ha ka sien kaba nyngkong ïa kane ka jingleh jong u VC. U VC u la don la ka khana kaba u ïai mlien ban jah ne ban ym shimkhia haba don kum kine ki jingeh, ha kaba kane ka la pynduh ïa ka jingshahniah na ka liang jong ki samla pule. Kane ka jingïaibteng jong u ban ym pyndep ïa ki la kamram ha ka por ba donkam kyrkieh ka la pynlong ïa ki samla pule ban bitar,” ki la ong ha ka shithi.
Na ka liang u bah A.L Hek haba iakren bad ki lad pathai khubor u la ong ba ka sorkar pdeng shen kan sa shim rai halor ka jingweng ïa u Vice Chancellor ka NEHU hadien ba la bteng kane ka jingshah thngan ba khlem buh por jong ki samla pule ha katei ka Univeristy naduh ka NEHUSU haduh ka KSU NEHU Unit.
U la ïathuh “ Nga la phah da ka jingthoh kaba khlaiñ bha sha ka sorkar pdeng bad khlem pep ka sorkar pdeng kan sa shim beit ka rai halor kane ka kam ban pynthikna ba ka jingjai jai bad ka jingïaid beit ïaid ryntih hapoh ka Univerity kan wan phai biang”.
U la ong ka sorkar pdeng kan hapban ïaid ryngkat bad ki jingsngew bad ka sur jong ki paidbah ka jylla halor ki mat jingdawa jongki. U la ïathuh tang ka sorkar pdeng kaba lah ban shim ïa ka rai ban weng ïa ki Vice Chancellor jong ki Univeristy jongka sorkar pdeng kata kum ka NEHU.U la ïathuh ruh ba haduh mynta ym don ba tip shano une u VC u jah rngai nalor ba la pynkhlaiñ bha ïa ki bor pahara ha katei ka jaka sah jongu. Halor ka jingshahlun maw ïa ka ïingsah bad ka kali u VC, u Bah Hek ula ong ba ki jingïakhih ki dei ban long ha ka lynti kaba jai jai ym ban pynjulor ïa ki nongkynti jong kiwei.
U Myntri ula soi pynskhem bad phah ruh ïa ka shithi bala aiti da ka Meghalaya Tribal Teachers’ Association (MeTTA) ka NEHU sha ka Sorkar Pdeng. Kat kum ka jingong jong u, ka Sorkar kan sa shim ïa ka kaiphod ba pura halor kane ka jingjia shuwa ban shim ïa ka rai halor kane ka kam.
“Nga la ïakren ïa ki kam ka NEHU bad ki Nongialam ba hakhlieh jong ka BJP ha Delhi” ula ong haba pynpaw ba ïa kane ka kam yn sa pynbeit noh kham kloi kat kaba lah.
Ha kajuh ka por, u Bah Hek ula ong ba ka Sorkar Jylla kam shym la sngap jar satia halor kane ka kam.