Ai jingthoh ka RIMS sha Delhi ban pynbeit jaka pule ïa ki samla pule doktor ha Meghalaya bad Assam
![](https://mawphor.com/wp-content/uploads/2022/03/mawphor.jpg)
Shillong,Naitung 10 : Namar ka jingïakynad jaidbynriew bym ikut shuh ha Manipur, ka Regional Institute of Medical Sciences (RIMS), Imphal, ka la kyrpad ïa ka Ministry of Health ba kan pynbeit ïa ka jaka shim klass ïa ki 29 ngut ki samla pule doktor jong ka Under-Graduate bad Postgraduate ka RIMS ha Meghalaya bad Assam.
Haba pynpaw ba kine ki 29 ngut ki samla pule riewlum ki la phet na Imphal na ki kam ïaumsnam bad sheptieng ban wanphai pat, ka RIMS ka la pyntip ruh sha ka Health Ministry ba ka jingpynbeit ïa ki jaka shim klass ha ka Institute lane ha kiwei ki Institute ka Manipur ka lah ban nym pat long satia namar ba ka jinglong jingman kam pat long shngaiñ ïa ki samla ba kin wan sha ki jaka pule.
Ha ka shithi sha u Joint Secretary (NE) ka Health Ministry ba la phah ha ka 7 tarik Naitung, u Deputy Director (Administration) ka RIMS u Naoren Indrakumar Singh ula ong ba ki klass jong ki Under-Graduate bad Post Graduate ki la sdang ha RIMS Imphal naduh ka 22 tarik Jymmang hynrei 29 ngut ki samla pule (17 ki MBBS Under-Graduate bad 6 ki BDS Under-Graduate bad 6 ki Post Graduate) mynta kim lah satia ban wan shong klass namar ka jingbym shong shngaiñ hapoh ka Jylla.
U Singh ula kyrpad ïa ka Health Ministry ba kan tuklar ha ka ban lah pynbeit ïa ki jaka shim klass ïa kine ki samla pule shabar ka Manipur kynthup ban pynïoh jingbit na ka National Medical Council na ka bynta ki 17 ngut ki samla pule MBBS Under-Graduate ba kin pynbteng ïa ki jingpule jong ki ha NEIGRIHMS ha Shillong, 6 ngut ki BDS Under-Graduate ha Regional Dental College, Guwahati bad 6 ngut ki Post Graduate ha ka Guwahati Medical College lane kiwei kiwei.
Lah ban kdew ba bun ngut ki samla pule Medical na Meghalaya bad kiwei ki Jylla ka thaiñ Shatei Lam Mihngi ki la phet na RIMS Imphal ha u bnai Jymmang hadien ka jingkhie ka thma ïapher jaidbynriew hapdeng ki Meitei bad ki Kuki.
Kumjuh ruh, palat 800 ngut ki Kuki kiba la kylla phetwit namar kane ka thma ïapher jaidbynriew, ki la wan shong riehtngen mynta ha Shillong.
U President ka Kuki Students’ Organisation, Shillong,Dr Jangkhohao Hangshing ula ong ba ka jing kheiñ ba ki la buh ïa ka jingwan ki briew na Manipur ka dang long tang haduh ka taiew ba nyngkong jong u Jylliew bad lada ñiew lang bad ki samla pule, ka jingdon jong kiba wan phet sha Shillong kaba kot ïa kumba 1000 ngut.