Shillong, Jylliew 30: Ka North Eastern Indira Gandhi Regional Institute of Health and Medical Sciences (NEIGRIHMS) ka la jam sha uwei pat u mawmer ha kaba ïadei bad ka lad ai jingsumar Cardiac Surgery ha kaba ka la lah ban leh ïa ka Autologous Right Atrial Appendage (RAA) derived Neo Pulmonary Valve Construction Surgery ïa iwei iba ïoh ïa ka jingpang Pulmonary Valve Stenosis.
Ki bor pynïaid ka NEIGRIHMS ki la pyntip ba ïa katei ka Surgery ka dei kaba la leh ha ka sien kaba nyngkong eh ha ka thaiñ shatei lam mihngi baroh kawei.
Ka Pulmonary valve stenosis ka dei ka bynta jong ka jingpang Klongsnam, ha kaba ki thied ki jaw ki la sdang khim bha kiba pynïaid ïa ka snam na u klongsnam sha ki thied ki Tor.
Kum kane ka jingpang lada ka jur palat ka lah ban pynlong ïa u briew ban tlot, ban duna bor ha kaban ring mynsiem, ban pang ka shadem bad ban ïapler.
La pyndonkam lut ïa ki buit ki bor ha kaban bujli ïa u pulmonary valve uba la sniew da kaba pyndonkam da u Right Atrial Appendage (RAA) jong u nongpang hi, khnang ba kan long kaba neh slem bha namar ka jingdon ïa ki jinglong kiba kyrpang.
Ka RAA valve ka dei kaba la shna hi na ki thied ki jaw jong u nongpang ïa kaba ym donkam satia ban khleh ïa kino kino ki dawai dashin bad kiba lah ban ïar, jem bad stang bad ki dei ruh kiba lah ban ïaid ryngkat lang ha ka jingroi ha ka met u nongpang bad kane kan pyllait na ka jingdonkam ban bujli biang.
ïa katei ka Surgery la leh da ka jingïadon bynta jong ki Doctor, Nurse bad ki Technicain na ki tnad bapher jong ka NEIGRIHMS kiba kynthup na ka tnad Cardiothoracic and Vascular Surgery (CTVS) hapoh ka jingïalam u Dr. Reuben Lamiaki Kynta, Associate Professor ka CTVS, lyngba ka jingïarap jongka Dr. Mercyful Lyngdoh bad ki nongtrei ka OT jongka CTVS.
Nalor kane la ïa donlang u Dr. Sunny, Assistant Professor ka Anaesthesiology bad ka kynhun ka jongu katba u Dr. Amit Malviya, Associate Professor ka Cardiology bad ka kynhun ka jongu katba ïa ka jingïarap ha ka Perfusion la pynbiang da u Mrinal Mandal, Sr. Perfusionist bad L Dkhar ryngkat bad ka jingïarap bad jingkyrshan jong ki Nurse na ka CTVS-ICU bad CTVS Ward.
La pyllait noh ïa u nongpang bad ha ka jingbuddien la shem ba ym shym la don kino kino ki dak ki shin ban don kano kano ka jingshitom.
Ki bor pynïaid ka NEIGRIHMS ki la pynpaw ba kane ka jingjop ïa ka jingleh Operation bad jingai jingsumar ïa ka pulmonary valve stenosis ha ka thaiñ bad kane kan ai jingmyntoi ïa ki nongpang ha ki pateng ban wan.
