Shillong, Naitung 1: Ka long ka sngi ka ban sah jingkynmaw ïa ka jylla Meghalaya ha kaba baroh 3 tylli ki Unit jongka Ganol Hydro Power Plant ki la sdang ban treikam bad la pynïaid ryntih lang bad ka National Grid.
Kane ka dei ka sien jam kaba khraw ïa ka jingïaid lynti jong ka jylla na ka bynta ban pahuh pahai ka bording elektrik haba ki kor ki bor pynmih ïa ka bording elektrik kin lah ban pynmih ïa ka bording haduh 65 MU man la u snem.
U Myntri Rangbah ka jylla lyngba ka Twitter ka jongu ula pynbna, “Nga dap da ka jingkmen ba baroh 3 tylli ki Unit jongka Ganol Hydro Power Plant mynta ki la ïaid ryntih lang bad ka Grid, da kaba kyntiew ïa ka jingpynmih ïa ka bording elektrik man la u snem ka ban long ruh ka jingïaid lynti ban poi sha ka jingpahuh pahai ka bording. Nga ai khublei ïa baroh kiba la pynurlong ïa kane ka kam”.
Haba ki projek pynmih bording ki la ïaid ryntih lang bad ka grid, ka mut ba ki la treikam bad ki la lah ruh ban pynmih ïa ka bording bad kane ka jingïaid ryntih ka pyni ba baroh ki Unit ki la lah ban pynmih ïa ka bording elektrik kat kum ka jingdonkam jong ka Grid.
Kum ban shu kdew ha ka 4 tarik u Kyllalyngkot 2023 u Myntri Rangbah ka jylla u Conrad K. Sangma ula plie pyrda ïa ka Unit kaba nyngkong jongka Ganol Hydro Power Project ka ban pynmih ïa ka bording kaba kot 7.5 MW.
Ka Ganol Hydro Power Project ha West Garo Hills kan lah ban pynmih ïa ka bording haduh 22.5 MW haba baroh 3 tylli ki la sdang ban treikam.
Katei ka projek pynmih bording kala kot sha ka T. 560 Klur bad la sdang ïa kane ka projek ha u snem 2014 bad ka la jan poi ha u pud ban khang khyrdep noh namar ka jingkyrduh pisa, hynrei haba ka sorkar MDA hapoh ka jingïalam u Conrad Sangma ka la wan haka bor ha u snem 2018 ka la pynthikna ba ka pisa kan poi naka bynta ban pynïaid shakhmat ïa kane ka projek bad la lah ban pynkhie im biang ïa kane ka projek.
Kane ka projek pynmih bording ka long kaba kongsan bha na ka bynta ban pyndap pynbiang ïa ka bording elektrik na ka bynta ki paidbah ka rilum Garo bad khamtam haba ka jylla ka mad ïa ka jingkyrduh jong ka bording elektrik.
Ka jylla ïa mynta ka la lah ban pynmih tang 380 MW ka bording bad ka jylla ka la mad ïa ka jingpynlip iaka bording elektrik haduh 8-10 kynta mynta la 2 bnai tam namar ka jingduna palat ha ka ban pynmih ïa ka bording elektrik namar ka jingduna u slap.
