Ai jingpynshai u BDO halor ka jingkynnoh bad jingkynthoh ki VEC ka Lumshnong C&Rd Block
Khliehriat, Nailur 4: U Block Development Officer jong ka Wapung C&RC Block uba peit ruh ia ka Lumshnong C&RD Block, u Dr T.Shylla, u la pynpaw ka jingsngew lyngngoh ïa ka jingkynnoh ki VEC kiba don hapoh ka Lumshnong C&RD Block kumba la paw ha ki pathai khubor ha kaba la kynnoh ba u BDO um shym la shah ïa ki VEC kiba don hapoh ka Lumshnong C & RD Block ban pynrung ïa ki bai tiar ne ban enter ïa ki materials bill jong ki, kiba ki VEC ki la dep pyntrei hashwa ka Financial year jong u snem 2023-2024 bad wat hadien kane ka Financial Year ruh um shah ban enter ïa ki materials bill jong ki VEC kiba na ki shnong bapher bapher kiba hap hapoh ka Lumshnong C & RD Block.
Halor kane ka jingkynnoh u BDO u la ong ba ha ka jingshisha u la dep ban pyllait ïa baroh ki bill sha ki VEC, kata naduh ka Financial year jong u snem 2023-24.
U Dr T.Shylla, u pynshai shuh shuh ba ka jingpynsahteng ïa ki bill kumba la kynnoh da ki VEC ki dei tang ïa kito ki kam kiba dang sahteng bad kiba slem ban pyndep ïa ki jingpyntrei da ki VEC kiba ki VEC hi ki pynslem ban wan ai ne submit ïa ki bill jong ki sha ophis, hynrei wat ïa kine ki bill ba pynslem ruh na ka liang ka ophis ka la dep ban pynrung hapoh ka MIS hapoh u snem 2024-2025 ha kaba yn sa lah ban pyllait ha ka Financial Year jong u snem 2024-2015.
La pynshai ruh ba ïa ka Fund ba ioh ha ka FY 2023-24 ruh la dep ban pyllait sha ki VEC kiba don ïa ki Bill jong utei u snem, katba ïa ki Bill jong ka Lumshnong C&RD ki dei ki ki bill jong ka FY 2024-25 kaba yn sa siew ynda la ioh ïa ka Fund.
Utei u BDO, u la ong ba ka long kaba sngew lyngngoh halor ka jingkynnoh ki VEC namar na ka liang ka ophis ka la dep ban pynshai sha baroh ki shnong bad ki VEC kiba hap hapoh ka Lumshnong C&RD ha kaba kiba bun ki shnong bad ki VEC ki la sngewthuh ïa kane ka jingpynshai hynrei ki don tang katto katne eh ki VEC ki bym sngewthuh kiba la shu kynnoh.
Te na ka liang u BDO, u kyrpad ïa ki VEC ba kin wan mih sha ophis bad ba kin wanrah ïa kita ki bill ba dang sahteng ne ki pending material bills jong ki jong kita ki snem kiba dang sah kata naduh u snem 2021-22, 2022-23 bad u snem 2023-24 khnang ba na ka liang u BDO un ioh ban pynshai bad ruh ba un dup tip namar ha ka jingshisha na ka liang u BDO hi u la dep pyllait lut ïa ki bills haduh u snem 2023-24 laitnoh kito ki bill kiba sateng kiba na ka liang ki VEC hi kiba na ka daw ka jingpynslem jong ki hi ban pyndep ïa ki jingpyntrei bad kiba pynslem hi ban wanrah ïa ki bill sha ophis.