Shillong, Naiwieng 09 : U Chief Secretary ka Jylla, Bah DP Wahlang u la ai ka jingïaroh ïa ka jingpynkhreh ïa ka 2nd North East Olympic Games 2022, khamtam eh ïa ki ophisar, ki volunteer bad ki nongtrei kiba don bynta ha katei ka jingpynbit pynbiang ïa katei ka lympung ïalehkai kaba heh tam ha ka thaiñ shatei lam-mihngi jong ka Ri.
Katei ka NEOG 2022 kan sdang naduh kane ka sngi Palei watla ka jingïalehkai phutbol ka la dep sdang bad ka la ïaid shakhmat mynta.
Haba kren ha ka jingïalang jong ki heh sorkar, ki bor pynïaid ryngkat ka Meghalaya State Olympic Association, na ka liang u Bah DP Wahlang u la pynïasyriem ïa katei ka prokram kum ka jingïakhun ban pynkhreh ïa ka eksam civil service, ha kaba ka Meghalaya ka pdiang ïa ka 39th National Games.
“Ngi la leh bha haduh mynta bad ngi sdang ruh da ka rukom kaba itynnad kumta nga sngew ban ai khublei ïa baroh kiba la trei borbah. Ka Games Secretariat ruh ka la trei shitom khlem shongthait,” ong u Chief Secretary.
Katkum ka jingong jong u, ka bynta kaba hakhmat eh jong katei ka Games ka long ban wanrah nyngkong eh ïa ka jingshngaiñ bad kyntu ïa baroh ruh ba kin buh hakhmat eh ïa katei ka bynta.
Shwa kane, na ka liang u Co-Chairman ka NEOG 2022 ba dei ruh u Commissioner Secretary jong ka sorkar jylla, u Dr. Vijay Kumar u la ong ba katei ka jingpynkhreh kadei kaba radbah bha namar kadei kaba la don bynta lang da baroh ha kaba bun ki la trei shitom la bun sngi bun taiew mynta.
La ïoh ruh ïa ka jingkren na u Bah Wanshan Kharkrang, Tournament Director ba dei peit ïa ka phutbol bad ruh na ka liang u Bah Rangksan Mawroh, ba peit ïa ka jaka sah jong ki nongïalehkai kumjuh ruh na ka DC jong ka East Khasi Hills Kong I Laloo.
