Khliehriat, Iaiong 07: Ka seng FKJGP-Khliehriat Circle ka ai ka jingiaroh ïa ka Shnong Wapung Skur, East Jaiñtia Hills District halor ka jingstad jong ka naduh ki nongialam shnong haduh ki nongshong shnong kiba la shim ïa ka rai ban kyntai mardor ïa ka Om Om Coke lane ïa kino kino ki karkhana Coke kiban wan hapoh shnong.
“Namar ba baroh ngi iatip ba ki karkhana Coke plant hi ki dei kiba pynsniew ïa ka lyer ka ba khuid, ka seng ka sngewphylla ruh ban iohi ba Balei? ki coke plant ki kwah pynieng ïa ka plant jong ki barabor hajan ki shnong ki thaw bad balei kim wad jaka sha jngai na ka shnong bad wat kawei kaba ladon lypa ruh ha rud ka surok NH-6 ha Mookhep kaba kyrteng ka ABhi coke haba iaid lynti najan jong kane ka karkhana ym lah wat tang ban ring mynsien namar ba sma palat katta ruh dang mut ban pynbun da kaba thmu ban wanrah sa kawei”ong u kyrwoh na ka seng.
“Ka seng ka iohi ba kane kawei, ka Om Om Coke kaba mut shna hapoh ka Shnong Mokhep hynrei la shah pynsangeh noh ha ki nong shong Shnong jong ka Wapungskur namar ba ka jaka ban shna ïa katei ka Coke kala tam pud sha ki jaka jong ka Wapung Skur, katkum ka jingioh jingtip ka seng da ki phew tylli ki Coke ki la wan tyrwa ban buh plant hapoh ka shnong Wapungskur hynrei da ka jing iohi jngai ka shnong ka la kyntait ban pdiang ïa ki bad ngi sngew sarong ba don kum kine ki shnong kiba dang pyrkhat ïa ka lawei ki khun ki kti”.
Na ka liang ka FKJGP-Khliehriat Circle ka pynrem jur ïa u Waheh Shnong jong ka Shnong Mookhep halor ka jingrai marwei jong u ban ai NOC ïa ka Om Om Coke, ka seng ka iohi ruh ïa ka jing kynrei ki dukan kiad beaiñ bad ki wine shop kiba don Licence kiba la kynrei bha hapoh ka Shnong Mookhep, kane ka buh jingma ïa ki khun samla ka thaiñ bad ka seng ka pynrem jur ruh ïa u Daloi ka Elaka Jwai bad ïa ka JHADC kiba ai NOC kulmar khlem ka jingbishar bniah bad kumjuh ïa ka tnat Meghalaya State Pollution Control Board kaba ai ïa ka CTE khlem da bishar bniah “Namar lada peit kumne kitei ki shnat treikam kim pat biang bha ban trei ïa ka kam naduh u Daloi elaka Jowai, Waheh Shnong, JHADC bad ka MSPCB” ong ka seng.
“Khadduh ka seng kan sa pynher da ki jingthoh sha kiba halor ban dawa pynsangeh ïa katei ka COKE PLANT bad ha kajuh ka por ka seng hi ka pyrshah ïa kino kino ki Coke plant hapoh ka thaiñ”, pynkut ka kyrwoh na u President FKJGP-Khliehriat Circle, u bah Michal Chyrmang.
