Shillong, Nohprah : Kum ka dak ban pynshlur bad ai mynsiem shuh shuh u MLA ka Mawlai u Bah PT Sawkmie ha ka 14 tarik mynta u bnai u la noh synñiang da ka work order ba 4 lak tyngka sha ki ar tylli ki skul hikai put hikai tem, kum ka piano, guitar, violin bad kiwei, kiba don ha Mawlai Mawroh.
Kine ki ar tylli ki skul ki dei ka James Music School kaba la ïoh ia ka jingïarap kaba T.3 lak bad ka Medlina Music Skul kaba la ïoh T.1 lak.
U trai ka James Music School, u bah James L. Nongpiur u la ai khublei bad pynpaw ka jingsngew nguh ïa u MLA ka thain ha kaba ïa dei bad kane ka jingai jingïarap ka jong u.
Nalor kata u la ïathuh ruh ba ïa ka skul hikai tem la seng naduh u snem 1995, kaba la sdang shuwa na ki 4-5 ngut bad mynta ki la don haduh 200 ngut kiban shah hikai ha ki kynta bapher bapher. U pynpaw ruh ba kane ka skul ka la lah ban sei haduh 12 ngut ki instructor ne nonghikai kaba la long ka jingkyrkhu bah na ka bynta jong ki.
Ha kajuh ka por u trai ka Medlina Music School u bah Balmy L. Nongpiur ruh u la ai khublei ïa u MLA bad u la ïathuh ba ki la seng ïa ka skul ha u snem 2010 bad mynta ki don kumba 30 ngut ba ki hikai violin bad piano.
Katba na ka liang u bah Sawkmie ha ka jingkren u la pynpaw ba kane ka jingïarap ka long kum ka dak ban ai mynsiem ïa ki ba kin nanglah ban trei shitom bad ban kitbok ïa ki ba kin nangkiew ha kane ka kam ka jong ki.
U pynpaw ruh ka jingsngewkmen ban ïohi ïa kum kine ki music school kiba long kum ki nongai kam aijam, khamtam ha kum kine ki por bakyrduh kam kyrduh jam.
Shuh shuh ha kane ka sngi la ïoh ruh ka jingkren na bah Homer Kharkongor, president ka UDP Mawlai Circle bah Teibok Kharkongor, Secretary UDP Mawlai bad kiwei kiwei pat ha ka jingïadon lang ki riew rangbah bad ki samla.
