Shillong, Nailar 29 : Palat 700 ngut ki khynnah skul na ki skul bapher bapher jong ka West Jaintïa Hills, West Khasi Hills, bad South Garo Hills ki la shim bynta ha ka APEX prokram kaba dang shu pyllait paidbah da ka AVENUES, Shillong. Ka jingpynlong ïa kane ka prokram ka long ruh shibynta jong ka jingrakhe dap 20 lyngkhuh snem jong ka AVENUES ha ka jingïaid lynti jong ka kum ka socïal enterprise kaba ju ai jinghikai bad training ïa ki khynnah samla ka jylla bad shatei lam mihngi. Ïa ka APEX prokram la ïoh pynlong 5 sngi lynter naduh ka 21 tarik Nailar ha ki 5 tylli ki skul jong kine ki 3 distrik bad la ïoh pynkut ha ka 25 tarik Nailar.
Ka APEX ka long ka jingpyrshang kaba thymmai bad kham pher namar ka AVENUES ka la pynwan dur ïa ka da kaba pyrshang bud ïa ka National Education Policy 2020 ban pynrung ïa ki jinghikai Saïan ban hikai ïa ki khynnah kumno ba kin pynproh ïa ka rukom pyrkhat pyrdaiñ bad ban long kiba myllien ban kylli bad ym tang ban shu pdiang ïa kaei kaba ki ïohsngew lane pule. Kaba kham pher shuh shuh ka long ba la pynrung ruh ïa ki khana tang bad khana puriskam (Folklore) ban hikai ïa ki khynnah samla kumno ba kin sarong ïa la ka jong ka kolshor, ban pynpaw ïa ki akor burom bad ban burom ïa kiwei pat ki kolshor. Ki jinghikai ba kongsan jong ka APEX ki kynthup ïa ki soft skills kum ki akor burom, ban buh bad kot ïa la ki thong, ban kren paidbah, ka jingïadei para briew, bad ka jingbha jingmiat ha baroh ki lïang. Ïa kine ki jinghikai ka AVENUES ka khot ïa ki kita ki “Human Skills for the Future” lane kita ki jingnang jingtip jong ki briew na bynta ka lawei kum ka Communication (kumno ban ïa kren bad ïadei para briew), Scientific Thinking (ka rukom pyrkhat pyrdaiñ), bad ka Wellbeing (ka jingbha jingmiat).
U Benjamin Marak, Principal, Pioneers’ Secondary School, Baghmara, u la pynpaw ïa ka jingsngewnguh ba bynta ka AVENUES kaba la wanrah ïa kane ka prokram sha ka skul jong u. U la ong, “Ka ju dei ka jingangnud jong nga ban sam ka jinghikai kaba myntoi kyllum bad kaba pynkhreh ïa ki khynnah jong ngi ban long ki jingmyntoi na bynta ka longïing longsem, ka jylla bad ka ri baroh kawei. ka long ruh ka jingthrang jong ngi ban ai ka jinghikai kaba bha tam ïa ki khynnah, kam pher la ki wan na kano kano ka jaka ruh.” U la ong shuh shuh ba kine ki jinghikai jong ka AVENUES lyngba ka APEX ki long ki rishot kiba ki khynnah ki lah ban tei ïa la ka lawei bad jingim halor jong ki. “Nga la lah ban ïohi ïa ka jingpher ha ki khynnah jong ngi tang ha kine ki 5 sngi bad nga kyrmen bad kane ka prokram kan rung sha kiwei ruh ki skul jong ka distrik bad jylla, bad lehse ka prokram kaba ïasyriem na bynta ki nonghikai ruh,” u la pynkut.
Ka Ribahun Kharjahrin, Class 9 na Rev. JJM Nichols Roy Memorïal Secondary School, Nongstoin, ka la shim bynta ka kane ka prokram bad ka la ong, “Ha kine ki 5 sngi, nga la ïoh jingmyntoi shibun eh kumno ba ngan ïaid ngan ïeng, ban pynithuh ïalade bad pynpaw ïa ka akor burom. Nga lah ïoh jinghikai ruh lyngba ki activities bapher bapher kumno ban buh ïa ka thong ha ka jingim jong nga bad ban trei minot bad jop ïa kata ka thong.”
U Shivansh Awasthi (ÏAS), Deputy Commissioner, South Garo Hills, uba long u kongsan ha ka prokram pynkut ha Baghmara, u la ong, “Ïa kine baroh 3 tylli ki bynta jong ka APEX – Communication, Scientific Thinking bad Wellbeing – la pynshong nongrim halor ka National Education Policy bad ka ïaid ryngkat ryngkat bad ki jingthmu jingpyrshang jong ngi na bynta ka education hangne ha jylla jong ngi. Ki jinghikai ki peit ïa ka jingmyntoi kyllum jong ki khynnah pule – kata ka rukom pyrkhat (mind), ka jingsngew (emotion) bad ka rukom leh (action).” U la pynkut da kaba ong ba u kyrmen skhem ba ka APEX kan dang kiew shuh shuh ha ka rukom pyntreikam ïa ka.
U Founder-CEO ka Avenues, Mark L Stone, u la don ryngkat ha ka prokram pynkut ha Baghmara bad u la ioh batai shai ïa ka jingthmu jong ka APEX da kaba ong, “Ïa ka APEX prokram la pynwandur na 20 snem ka jingtrei jong ngi ha ka soft skills bad personal development hapdeng ki khynnah samla ka jylla, bad ka wanrah lang ïa ki jingnang jingtip lane ki skills kiba long kiba donkam eh ha ki sngi ki ïa kiba mynta. Da kaba pynrung ïa kine ki jait training sha ki jaka ba kham kyndong ruh lyngba ki trainers jong ngi kiba lah ban hikai ha ki ktien bapher bapher, kynthup ïa ka Garo,
Khasi, Pnar, bad Phareng, ngi ngeit ba kine ki jingpyrshang jong ngi kin long ki jingïarap bad jingkyrshan ïa ki jingpyrshang jong ka sorkar. Ka APEX model ka ïarap ïa ki khynnah ba kin long kiba shlur, kiba sngewtynnad bad burom ïa ka sobjek Saïan, kiba don ki jingmlien kiba bha bad ba tei ïa ka jingim jong ki, bad kiba sarong ïa la ka jong ka tynrai. Ngi rai ban pynmih ïa ka report kaba jylliew na kane ka jingpyrshang ba thymmai jong ngi bad ban pynjanai shuh shuh ïa ka model ban ïahap bad ki skul ki kolej baroh, ha kano kano ka distrik.”
U C P Mawkon (ÏAS), Additional Deputy Commissioner, West Khasi Hills, uba long u kongsan ha ka prokram pynkut ha Nongstoin, u la ong, “Mynba ka AVENUES ka wan nyngkong sha nga ban batai shaphang kane ka APEX, nga la ong ïa ki ba ka long ka jingpyrshang kaba bha bad donkam eh na bynta ki khynnah jong ngi. Kum kine ki prokram ki wanrah jingmyntoi shibun namar ki hikai ïa ki khynnah samla kumno bad nang ban stad, ban sngewthuh bad ban pyndonkam ïa ka jingstad jingshemphang jong ki ha ka jingim ba man la ka sngi da ka jingshlur.”
Ka Agame Nïasa A Sangma, Class 8 na United Baptist Secondary School, Baghmara, ka la ong, “Ka APEX ka pher bha na ki jinghikai ba ngi ïoh man ka sngi ha skul. Ki jinghikai ba nga ïoh ki kynthup ïa ka akor burom, ka rukom kren para briew, ka rukom ïeng rukom shong bad kumno ba ngan shlur bad nang ban ïeng ban kren ha khmat paidbah.”
Ka Mabel L Kynta (MCS), Additional Deputy Commissioner, West Jaintïa Hills, ka la kren kum ka kongsan ha ka prokram pynkut ha Khliehtyrshi da kaba ong, “Ki jingpule ha skul ki lah ban ai jingnang jingstad ïa phi hynrei kim lah ban hikai ïa phi kumno ban ïeng ban ïaid bad ban pynkhreh ïalade na bynta kum ki interview kam bad ban ïeng ban kren hakhmat paidbha. Na ki jingkren jong ki khynnah mynta ka sngi nga ïohi ba kane ka prokram ka la ïarap ïa phi ban long kiba kham shlur bad kham tbit ban kren hakhmat paidbah tang hapoh 5 sngi.”
Ïa kane ka prokram la pynlong da ka AVENUES ha ka Pioneer’s Secondary School bad United Baptist Secondary School ha Baghmara, South Garo Hills; Thomas Jones Secondary School bad Rev. JJM Nichols Roy Memorïal Secondary School ha Nongstoin, West Khasi Hills; bad Adventist Higher Secondary School ha Khliehtyrshi, West Jaintïa Hills, naduh ka 21 haduh 25 tarik Nailar 2023.
