Nongpoh, Naitung 10: Kum ka jingai mynsiem ïakiba bun ki samla pule ka thaiñ Jirang kiba wan shakhmat haka jingpule jong ki ha ka ba ïadei bad ka eksamin SSLC ba dang shu pynbna shen da ka MBOSE, u MLA ka Jirang sa shisien pat u la shim biang ïaka sienjam ban sam khusnam sha ki samla pule ba pass bha na Jirang Constituency kaba dei ruh ka sien kaba 3 naduh ba u la shah jied kum u nongmihkhmat hapoh ka jingpeit bad pynbit pynbiang ka Award Committee jong ka Jirang Constituency.
Ha katei ka sngi u Bah Macmilan Byrsat MLA ka Nongstoiñ u la wan ban shim bynta kum u kongsan haka jingdonlang u Bah Sosthenes Sohtun MLA ka Jirang kum u symbud kongsan, u Bah Victor Rani MDC ka Jirang Constituency, u P Hajong BDO Ka Jirang C&RD Block, Fr. Michael Sun Head Master ka St. Peter’s Secondary School, ki Head Master naki skul bapher bapher, ki nonghikai, ki kmie ki kpa bad ki samla pule kiba la ioh pdiang ka katei ka award.
Ïa katei ka jingai khusnam sha ki samla pule ba pass bha haka SSLC la pynlong da ka jingïalang haka skul St. Peter Secondary School Umkadhor ha kaba 51 ngut ki samla pule napoh ka thaiñ kiba la pass u snem 2021-22 bad kumjuh ruh u snem 2020, kiba wan haka kyrdan ba nyngkong na Jirang Constituency kila shah pynkup burom da ki jaiñ bad ki momentous bala ai sngewbha da u MLA kum ka jing sah jingkynmaw haka jingim jong ki halor ka jing lah jong ki ban leh bha haka eksamin SSLC bala dep.
Ha katei ka sngi la ioh ruh ban sam ïaki tablet mobile bala mang kyrpang da ka sorkar sha ki samla pule lyngba ka CM Digital Learning Aids Scheme.
Haba kren ha katei ka sngi kum u kongsan u Bah Macmilan Byrsat u la pynpaw ka jingsngewkmen kaba khraw ban ioh pynkup burom ïaki samla pule ka thaiñ kiba la wan shakhmat haka eksamin SSLC bad kane ka dei ruh ka sienjam ba u MLA ka Jirang u la shimkhia naduh ba u la shah jied kum u nongmihkhmat, ban ai khusnam sha ki samla pule kum ka jing ai mynsiem bad pynshlur ïaki samla pule, bad ka ban dang bteng man u snem.
U la ai mynsiem ruh ha katei ka sngi ba kin long ki samla ki ba don ka akor ka burom kiba tipsngi bad kiba don ka jingangnud haka jingim jong ki ban trei shitom shuh shuh haki jingpule ba kham shalor khnang ba kin long ki khlur ba tyngshain haka jingim jong ki ban wanrah ruh ka nam bad burom iaka ing ka sem bad ka district baroh kawei namar khlem ka jingnang jinstad ka long kaba eh ban ïalam ïaka jylla.
Naka liang u MLA ka Jirang u Bah Sosthenes Sohtun u la ong ba ka thong kaba hakhmat kaba la pynlong ïa u MLA ka Jirang ban pynkup burom sha ki samla pule kiba la pass bha haka eksamin SSLC ka dei namar ba u kwah ban ai mynsiem ïaki samla pule bad ban kyntiew ïaka pule ka puthi ha katei ka thaiñ kumba ki samla ha katei ka thaiñ kim duna shuh haba ïa nujor bad kiwei kiwei ki constituency.
U la ong ruh watla ka Jirang Constittuency ka dang dei ka constituency kaba dang sahdien tam naduh ki kam pynroi haba nujor bad ki snem bala leit noh hynrei kum u MLA u la shimkhia ban wanrah shibun ki kam pynroi bad ha baroh ki liang hynrei ka long ruh ka jing sngewkmen kaba khraw ba na katei ka constituency ki mih ki khraw pyrkhat bad ki khynnah kiba stad kiba ban sa btin lynti naka bynta ka ban sa wan kumba la paw ha ka result eksamin SSLC ba ki khynnah kila wan shakhmat bad lah ban leh bha.
U la ai mynsiem ruh sha kitei ki samla kiba ioh pdiang ïaka khusnam ba ki dei ban dang trei shitom shuh shuh haki jingpule ba kham shalor naka bynta ka lawei ba phyrnai haka jingim jong ki, namar kane ka dei ka jingsdang jong ka jingim jong ki.
Kum ban shu pynpaw ba naka liang u MLA u la pynshlur ruh ïaki khun samla ban ai da ka laptop sha kito ki samla kiba rung haka top 20 jong ka eksamin SSLC.
