Ha jingkhang ka UNESCO poi ka jingtyrwa ban ithuh ïa ka Jingkieng Jri kum ka World Heritage

Shillong, K’Lyngkot 28 : Ïa ka jingtyrwa jong ka India na ka bynta ka Jingkieng Jri ba kan rung noh ha ka World Heritage, la tyrwa ha kane ka sngi Balang da u HE Vishal V Sharma ba dei u Ambassador ka India sha UNESCO ha u Director jong ka UNESCO World Heritage Centre, u Lazare Assomo Eloundou. Kane ka jingtyrwa ka long ban ïakhun ban ai noh ka jingithuh ïa ka Jingkieng Jri kaba don ha Meghalaya ba kan rung ha katei ka thup mynta u snem kum ki jaka ba kyrpang tam kiba don ha ka pyrthei
Haba aiti ai kane ka jingtyrwa ha Parish hynne ka sngi, u Ambassador Vishal V Sharma u la ai khublei ïa u Myntri Rangbahduh ka Ri u Narendra Modi, nangta ia u Myntri ka tnad Culture ka sorkar pdeng u Gajendra Singh Shekhawat, ïa u Myntri Rangbah ka Jylla, Conrad K Sangma, Principal Secretary ka jylla Bah FR Kharkongor, ki ophisar na ka Achaeological Survey India, nangta ka Ministry of External Affairs, ki riewshemphang bad ki trai shnong kiba la ri la sumar ïa kane ka spah bah.
Katkum ka kyrwoh la ong ruh ba kine ki jingkieng jri kiba don ha kylleng ka rilum Khasi bad Jaintia, kane ka jingtyrwa ka pyni ruh ïa ka rukom long ba kyrpang kaba la pynwandur da ki phew snem da ki nongshong shnong ka rilum Khasi bad Jaintia. “Kane ka pyni ïa ka jingïadei kaba jan bha hapdeng ki nongshong shnong bad ka mei mariang bad ka jingïadei kaba jan ha ka jinglong tynrai ïa ka khyndew ka shyiap, ka synshar khadar bad ka jingsumar ïa ka mariang.
Shuh shuh la ong ruh ba ka jingphah ïa kane ka jingtyrwa ka pyni ruh ïa ka jingthrang jong ka India ban ai ka jingithuh bad ka jingpynneh pynsah ïa ka jingriewspah ka kolshor bad ka jingdon jingem ka mei mariang khamtam eh haba ïadei bad ka jingtip kaba tynrai ïa ka jingpynneh pynsah ïa ka pateng lyngba ka UNESCO.