Tohkit bad thwet jur ki pulit ban ïohkem ïa ki briew kiba donkti tah poster ISIS-K ha Tura

Shillong, Kyllalyngkot 28: Hadien ba la lap ba don kiba tah ïa ka poster ISIS-K ha nongbah Tura ki Pulit ka West Garo Hills, ki la pynkhlaiñ bha ïa ka jingtohkit bad jingthwet jur ban ïohkem ïa ki briew kiba donkti ha lyndet ka kam ban byrngem ïa ki paid Garo ba kin mih na Tura bad ki jaka them ka District hapoh u snem 2027.
Kane ka poster ka dei kaba tah ha u post elektrik hajan ka Law College ha Araimile, Tura bad la lap ïa ka ha ka step sngi Balang, kaba la wanrah ka jingsngewkhia kaba jur halor ka jinglong ka suk ka saiñ hapoh ka District.
“ïa ka poster lah dep weng bad yn sa phah sha ka Forensic ban tohkit. Ngi la register ïa ka case ha Araimile Police Station bad ka jingtohkit kala sdang” ong u Superintendent of Police Abraham T Sangma haba kular “Ngi la shim ïa baroh ki sienjam ban lah pynithuh bad lap ïa ki briew ba donkti ha lyndet ka jingtah ïa ka poster bad kito kiba pynsaphriang ban pynsyier ïa ki paidbah bad wanrah ïa ka jingsngew pher jaidbynriew”.
U pyntip ba ïa mynta, ym shym la don kum kane ka poster ka ban tah ha kiwei pat ki jaka jong ka District.
“Ha ka jingpeit la paw ba kane lehse ka dei ka jingpyrshang jong kino kino ki briew ne kynhun ba kwah myntoi shimet ban pynrit mynsiem bad pynthut ïa ka shongsuk shongsaiñ ha ka district” ong u Sangma.
U SP ula kyntu ruh ïa ki paidbah ba kim dei ban khuslai bad ban nym shah ïalam bakla ha kum kine ki khubor ha ki social media lane kino kino ki rynsan kiba la pynsaphriang ban wanrah ïa ka jingsngew ïapher Jaidbynriew.
Kino kino ki jingishankhmat ne jingtip, la kyntu ïa ki paidbah ba kin pyntip mar mar ïa ka sha ki Police Station ba marjan, Outpost, Beat House lane Police Control Room, Tura ha kine ki mobile number – +91 8837423053, +91 7005530510 and +91 9089199064.