Mawkyrwat, Naitung 10 : U Ian Cambell u nong-kynthih (Triple Jumper) bad u nongkhur takma ksiar sahnam ka Australia uba la pynkheiñ ruh ïa ka World Record naduh u snem 1980 u la wan poi ha jylla Meghalaya na bynta ka prokram jied khynnah ïalehkai.
Ha ka sngi Saitjaiñ u Ian Cambell u la iuhkjat ha madan Saitsnad, Maw-langwir SWKHD ha kaba ka Meghalaya State Olympic Association bad ka Department jong ka Sports bad Youth Affairs ka sorkar Meghalaya ha ryngkat ka jingïatreilang bad u District Sports Officer, South West Khasi Hills District ka la ïoh ban pynlong ïa ka State Talent Identification (STI) 2022 kaba la pyntreikam da ka Edge 10 Group na UK.
Ha kane ka sngi nalor u Ian Cambell la donlang ruh u Alistair Tait, International Global Coach, u Bah John F. Kharshiing uba long u Working President jong ka Meghalaya State Olympic Association, u Bah Damang Syngkong, District Sports Officer, South West Khasi Hills District, ki nongtrei, ki nongïarap bad kumjuh ruh ki 200 ngut ki khynnah rit kiba la wan ban ïashimbynta ha kane ka sngi .
Ka jingthmu ba kongsan jong kane ka prokram ka long ban jied ne select ïa ki khynnah kiba don shisha ïa kita ki sap ki phong ha ki jait jingïalehkai ne ki games ha ki bynta bapher bapher bad ym tang ha ka jingïalehkai kynjatbol ne jingïamareh hynrei ha kiwei kiwei de ki bynta.
U bah John F. Kharshiïing uba long u Working President jong ka Meghalaya State Olympic Association haba kren ha ka jingïalang ba lyngkot u la pynpaw ïa ka jingsngewnguh ïa ka sorkar kaba la ïarap bad kyrshan ha kane ka jingthmu na ka bynta ban wad ïa ki ‘rang bad ki ‘thei ïalehlai ba kynsai bad kiba donsap da kaba pyndonkam da ki tiar thew ka juk mynta da kaba ïaid lyngba ki saw tylli ki bynta hapoh ka jingpeit bad jingpynïaid jong ki briew kiba nabar kiba la wanrah khnang na ka bynta kane ka jingthmu.
Ha kajuh ka por u la ong ba dei lyngba ka jingpyntreikam ïa kine ki Digital Equipments kaba wan automatic ïa ka ID Card ba lah ban lap ïa kito kiba don ïa kiba kum kine ki sap ki phong bad lada don kiba lah ban mareh 3 sekhon ne tam shaneng ha ka 20 metres ki la dei lypa ki International Athletes, ong u bah Kharshiïing.
Kumta u la pyntip ba ka sorkar ka la mang ïa ka bhah kaba 400 ngut shaneng na ka bynta kawei kawei ka distrik kaba lah ban kynjoh sha ka 6000 ngut ei ei ha baroh ki distrik. U la ong ba namar lehse ba ka dei ka sien kaba nyngkong bad ba ki briew kim pat da sngewthuh bha la lah ban sei tang kumba 200 ngut ei ei ha kane ka lympung kaba mynta.
U bah Kharshiïing u la pynshai ruh ba hadien ba la dep leh lut ïa kine ki test ha baroh ki 12 tylli ki distrik, yn phrang tang kumba 500 ngut ei ei ki khynnah kiba kham kynsai na kiba kynsai ha kaba ynsa ïoh ia ka report ne jingtip hadien 2 taïew ei ei bad ïa kine kiba la phrang ne jied kynsai yn phah sha ki jaka ai jinghikai ne academy kiba pher bapher ryngkat ka scholarship. Namarkata, u khmih lynti bad kyrmen ba kane ka distrik kan sa pynmih bun kiba kum kita ki ‘riew donsap ha kiba bun ki liang.
Ha ka jingkren lyngkot na ka liang u Ian Cambell u Olympian jong ka Australia u la pynpaw ïa ka jingsngewnguh ïa ka sorkar kaba la plie ïa kane ka lad na ka bynta ban jied ne phrang ïa ki ‘riew donsap ki ban paw ha ka pyrthei, da kaba ïathuh ba lyngba ka jingpyntreikam ïa kine ki tiar jong kane ka juk kaba mynta yn ïoh shisha ïa ki briew kiba kynsai khlem kano kano ka jingnoh shiliang ne jingbakla.
