Kut jingmut ki Seng Kynthei ban rat dyngkhong ïa ki jingdih ba sniew kum u drug bad kiwei kiwei

Shillong, K’ Lyngkot 28: Kum ka jingbteng ban pynkhlain naduh tynrai ha kaban ïa shim bynta ban rad dyngkhong ïa ki jingdih ba sniew ka Drug Reduction, Elimination & Action Mission (DREAM) kala pynlong ka jingïalang bad ki seng kynthei na ki dong bapher bapher mynta ka sngi.
Ha kane ka jingïalang la wan ban ïa shim bynta da kumba 50 ngut ki nongïalam na ki dong bad ki shnong bapher bapher kiba don ha nongbah Shillong ba kynthup lang ruh ïa ki nongialam ba paw khmat kum ka kong Theilin Phanbuh.
Kane ka jingwan ban ïa shim bynta shit rhem ka pynpaw ïa ka jingkut jingmut ban rat dyngkhong ïa ki jingsniew kiba la nang kharoi bad ban pynkhlain ïa ki jingpyrshang ban ïada bad pynbha pat ha ka imlang sahlang.
Ka jingialang ka la pynleit jingmut ruh ha kaba pynbha ïa ki lad jingiada bad ban pynskhem ïa ka bynta ba kongsan jong ki kynthei ha kaba ïada ïa ki longiing bad ki para marjan na ka jingma kaba nang kiew jong ka jingdih drok.
Ki nongmih khmat na ki kynhun Seng Kynthei bapher bapher ki la ïasam ïa ki jingshemphang na la ki jong ki shnong ki thaw, da kaba pynpaw ïa ki jingeh kiba mih, bad ka jingdonkam kyrkieh ïa ka jingpynsngewthuh, ka jingïarap kloi, ka jingai jingmut bad ka jingïatreilang.
U Mission Director ka DREAM Bah Francis Kharshiing ula batai sha ki nongiashim bynta halor ka thong jong ka Mission, ki kam kiba lah ïaid, bad ki jingkyrshan kiba don, kynthup ka jingai jingshakri ha ka jingiasyllok, ka jingpynioh ïa ki lad ai jingsumar, ki lad ai jinghikai ban treikam na ka bynta ki nongdih droks kiba la ioh pat ia ka jingkoit.
Na ka liang u Bah Francis Kharshiïing uba dei u MD jong ka DREAM haba kren ha ka jingïalang u la ai khublei ruh ïa ka jingnoh synniang kaba kordor jong ka Seng Kynthei ha ka jingpynlong ïa ka imlang sahlang, ka jingai jingmut ïa ki ïing ka sem, bad ka jingpyniadei bad ki samla.
U la ban jur ba ki kynthei ki don ka bynta kaba khraw ha ka ban ithuh kloi ïa ka jingdih buaid, ban ai jingkyrshan bad ban pynkiew ïa ka rukom im kaba koit ba khiah ha ka kyrdan jong ka iing ka sem.
Ki dkhot Seng Kynthei ki la pynpaw ïa ka jingkut jingmut jong ki ban ïashim bynta shitrhem ha ki jingpynsngewthuh paidbah, lyngba ki prokram pynïaid paidbah, bad ki kam kyrshan paralok hapoh ka phang pdeng jong ka DREAM. Ki la tyrwa ruh ban pynlong ïa ki jingialang ba man ka por bad ki jingialang ban pynkupbor shuh shuh ia ki nongialam seng kynthei kum ki nongiasaid ba ha khmat eh pyrshah ïa ka jingdih drok.