Shillong Naitung, 09: Ki laingut ki MDC barim jong ka KHADC ki la rai ban phet noh na ka seng kaba ki don ban leit pynïasoh noh sha kiwei pat ki seng saiñpyrthei. Kine ki MDC barim ki kynthup ïa u Bah Albinus Lyngdoh u MDC barim ka Umroi bad u Bah Hadrian Lyngdoh u MDC barim jong ka Mawkyrwat kiba dei na ka seng People Democratic Front (PDF bad u Bah Neil Antonio War u MDC barim jong ka Laitumkhrah na ka United Democratic Party (UDP).
Kine ki lai ngut ki la pynbna ïa kane ka rai ha ka sngi Balang.
Ha ka jingïakren bad ki lad pathai khubor, kine ki lai ngut ki MDC ki la ïathuh ba kane ka jingweng noh jong ki ïa ka jinglong dkhot ha ki jong ki Party kam dei na kano kano ka daw hynrei namar ka jingbym i don jingkyrmen satia ïa ka lawei jong ka party kaba ki don.
U Bah Antonio, haba ïathuh ïa ki daw jong ka jingphet noh jong u na ka UDP u la ong, “dei namar ka jingbym ïohi ba ki don ki nongïalam kiba don ka sur ban kren ïa ka jingeh ka jaidbynriew khamtam ha KHADC da kaba ai nuksa kum ïa ka VAB, ka jingïakhih ïa ka ishu MUDA kaba la shu sahteng kat haduh mynta.”
Ha kaba ïadei bad ka jingpynbeit ka Sorkar Jylla ïa u pud u sam bad ka jylla bad ka Assam na ka liang jong u Bah Antonio u la ong ba um lah ban shu peit ïa kaei kaba ki leh khlem da ïa syllok lang bad ka KHADC, ki trai jaka bad ki shnong bad ki hima ha kaba ki nongïalam kine ki seng kim shym la kren eiei ïa kane ka mat.
“Lashai hi ryngkat bad ki nongkyrshan ngin sa rai ïano ngin ai jingkyrshan namar na ka liang jong nga ngam don jingthmu shuh ban ïakhun ha ka elekshon MLA ha u snem 2023 namar ka jingbym koit bym khlaiñ bha ka met” ong u Bah Antonio.
U Bah Albinus u la ïathuh ba kane ka jingmih noh jong u na ka PDF ka dei hadien ba u la lap ba kane ka party kam don jingkyrmen satia ha Umroi namarba ha kane ka Constituency ki paidbah kim ju ai jingkyrshan satia ïa kiwei ki seng palat ïa ka seng Congress bad ïa ka UDP lada bishar na kaei kaba la jia ha ki elekshon jong ki snem ba ladep.
U la ong ba lada bishar na kaei kaba long mynta ba ha u snem 2023 ka jingïakhun kan dei hapdeng ka u Bah George B Lyngdoh uba dei u MLA ba mynta na ka AITC bad ki kyrtong jong ka seng Congress, UDP bad NPP.
Haba la kylli pat la sha ki seng aiu kin ïasoh na ka liang u Bah Albinus u la ïathuh ba um pat rai eiei hynrei ki paidbah nongkyrshan jong u ki kham noh ka mon sha ka seng Congress. U la ong ba shen kin sa shim ïa ka rai sha ka seng aiu ba kin leit ai jingkyrshan namar na ka liang jong u um don jingthmu satia ban aireng ha ka elekshon ha u snem 2023.
U Bah Hadrian u MDC barim jong ka Mawkyrwat ruh u la ïathuh ba ha Mawkyrwat ki paidbah kim ju mon ïa kiwei pat ki seng lait noh ïa ka UDP, HSPDP bad Congress namarba katkum ki resol jong ki elekshon jong ki snem ba ladep dei beit tang kine hi ki seng kiba jop.
Shuh shuh u la ïathuh ruh ba kane ka jingmih jong u ka dei beit thik na bynta tang ban ai jingkyrshan ïa kiwei pat ki seng kiba na ka liang ki ki nongkyrshan kin sa shim rai ha kine ki khyndiat sngi ki ban sa wan.
