Nongpoh, K’Lyngkot 28: Ka Muay Thai Association of Meghalaya (MTAM) ka la wanrah ïaka nam bad ka jingsngew sarong ïa ka jylla Meghalaya hadien ba ka kynhun ïakura jong ka jylla ka la ïoh ban wan ha ka kyrdan ba-ar ha ka 7th Umai National Senior Muay Thai Championship kaba dang shu dep long ha Hyderabad, Telangana.
Ïa kane ka jingïakhun la pynlong da ka Telangana Amateur Muay Thai Association ryngkat ka jingïatreilang bad ka WMC India, ha kaba haduh 29 tylli ki jylla na kylleng ka ri ki la shim bynta. Ka kynhun jong ka Meghalaya, hapoh ka jingïalam jong u Coach Bah Angelus Sun, ka la ïakhun bad shim bynta shitrhem ha kane ka lympung bad khur ruh haduh 55 tylli ki takma ba kynthup 27 ki takma ksiar, 17 ki rupa bad 11 tylli ki rnong.
Ym tang ha ka jingbun ki takma hynrei ka kynhun Muay Thai ka Meghalaya ka la pynpaw ruh ïa ka jingdon ki sap jingïakura ba kyrpang. Ka Elizabeth Marten, kawei na ki thei ïakura jong ka jylla, ka la shah jied kum ka Best Fighter napdeng ki kynthei ïakura na baroh ki jylla kiba la wan sha katei ka jingïakhun bad ïa kitei ki rang bad ki thei ïalehkai la pdiang burom mynta ka sngi haka shnong Saiden ha Ri-Bhoi District.
Haba ai jingkren sha ki lad pathai khubor, u Bah Angelus Sun kum u coach u la pynpaw ïa ka jingsngewkmen bad jingïaroh ïa baroh ki nonglehkai shynrang bad kynthei kiba la ïakhun wat hapdeng bun ki jingeh. U la ong ba ka jingïaishah bad ka jingtrei shitom jong ki samla ka la pynlong ïa ka kynhun ban ïoh ïa kane ka jingjop kaba heh. U la ai mynsiem ruh ïa kito kiba khlem ioh ïa ki takma ba kin ym duh mynsiem hynrei ban nang pynjanai ïa ka jingïakhun jong ki ha ki snem ban wan.
Ha kawei pat ka bynta, ki paidbah nongshong shnong ka Dong Nongkyndang, Saiden, ki la mih paidbah ban pdiang bad pynkup burom ïa u samla Ujal R. Marak, uwei na ki ïalehkai ka jylla uba la shim bynta ha katei ka jingïakhun. Utei u samla, uba dei naka shnong Saiden, Nongkyndang, uba la khur artylli ki takma ba kynthup ïaka ka takma ksiar ha ka jingïakhun Muaymai bad ka takma rupa ha ka jingïakhun Waikru.
U Rangbah Dong ka Nongkyndang, Saiden, u Bah Wanphaibiang Syiemlieh, u la ïalam ïa kane ka jingïapdiang paidbah u la ong ba ka jingjop jong u Ujal R. Marak ka long ka jingïoh burom ym tang ïa ka shnong hynrei ïa ka Jylla Meghalaya hi baroh kawei, bad ai ka jingkhublei ïa baroh ki rang bad thei ïalehkai kiba la shim bynta shitrhem ha katei ka lympung ban rah ïaka nam bad ka burom jong ka jylla sha ka kyrdan ba ar.
