Dawa pynsangeh ki phra tylli ki shnong ïa ka jingthmu ker sainar shiah Muktapur-Jaliakhola-Pasadwar

Jowai, K’lyngkot 27: Ki nongshong shnong na ki Phra tylli ki shnong kiba don ha khappud bad ka Ri Bangladesh kiba hap hapoh ka West Jaiñtia Hills District ba kynthup ïa ka Pasadwar, Kamsing, Jaliakhola, Lumpyngngad, Sankhat, Hawai Bhoi, Hawai Sutnga bad Lum Sohrmen kila pynpaw ka jingpyrshah jur bad dawa pynsangeh ïa ka jingthmu jong ka sorkar ban shna surok na ka bynta ka jingker sainar shiah ha kitei ki bynta khappud.
Ha ka sngi baar (27.01.26) kitei ki nongshong shnong kila lum ka jingïalang hajan ka Border Security Force BOP Jaliakhola ba kynthup naduh ki Waheh Shnong jong kitei ki 8 shnong kiba don hapoh ka Phra Shnong Social & Welfare Association, ki nongïalam ka Co-Ordination Committee on International Border (CCIB) hapoh ka jingïalam u General Secretary ma Kmen Myrchiang, u MDC ma Jamshaphrang Pohtam, ki trai jaka bad ki nongrep.
Ha kane ka jingïalang da kawei ka sur kila rai, katba kim pat ïoh ïa ka jingïakren pynbeit bad ki bor sorkar na ka liang ki trai bad ki nongrep kim ailad satia ïa kane ka kam ker sainar shiah ban ïaid shakhmat.
Shuh shuh la pynsngew lada sorkar ka sdang ban ker sainar shiah na Muktapur-Jaliakhola-Pasadwar kaba kynthup ïa u Border Pillar No 1283/7s haduh u Border Pillar No 1301/4s ka la long ka jingduh nong kaba khraw eh ïa ki nongrep kiba im ja na ka kam rep namar ka jingduh ei jong ki ïa ka jaka rep kumba 150 Yard na ka jaka ba thmu ban ker Sainar Shiah.
Kiba bun na ki trai jaka kiba pynsngew sha ka sorkar la kumno kumno ka jingker sainar shiah ka dei ban long beit na ki bynta u Zero Line, khnang ba ki jaka rep jong ki kim ym long kiba sep ei ynda la dep ka jingker sainar.
La ïathuh da ki nongshong shnong dang ha kine ki khyndiat sngi na ka liang ka National Buildings Construction Corporation Limited (NBCC) kaba pyntrei ïa kane ka kam ka la sdang ban shna ïa u Surok ban kiar sainar shiah, hynrei ki paidbah jong kitei ki shnong kila mih ban dawa pynsangeh shwa da kaba buh jingkylli mano ba ai NOC ban sdang ïa kane ka kam?.
Hadien ka jingwad jingtip, kitei ki trai jaka kila kynnoh ba ïa kane ka kam la ai jingbit bad kam trai da u Dolloi jong ka Elaka Satpator u ma Daman Lakashiang uba la leh khlem da khot ïa ka jingïalang ban pynsngew paidbah hashwa ban ai jingbit sha ka sorkar.
U Waheh Shnong ka Sankhat ma Elwise Khongïong ha ka jingkren sha ki lad pathai khubor ula ong kane ka jingshna surok ker Sainar shiah na Jaliakhola sha Sankhat la leh khlem ka jingtip ka shnong bad la kynnoh ïa kane ka kam la ai bor ha ka kyrteng u Dolloi ka Elaka Sarpator.
Kaba sngew phylla shuh shuh ka long balei u Dolloi u nud ban kam ïa kane ka jaka, wat ki Dolloi ba rim hashwa jong u kim shem la nud satia ban kam trai ïa ki jaka, halor kane u ma Khongïong ula pynrem jur ïa kane ka jingleh u Dolloi bad ki nongïalam kiba thmu ban thom da ka bor.
Ula kyntu ïa ka sorkar ban shimkhia bad ban pynsangeh noh ïa kane ka jingshna surok ban ker sainar shiah naduh mynta ka sngi, hynrei lada ki dang bteng ïa kane ka kam ka lah ban mih ka jingïakajia bad ka jingïaumsnam, haka juh ka por la dawa na u Dalloi ba un weng noh ïa ka jingkam trai jong u ïa ka jaka.
Na ka liang ka seng Khasi Students’ Union War Jaiñtia Circle kala mih shakhmat ha kane ka sngi ban ai jingkyrshan ïa ki paidbah kiba dei ki nongrep ha kitei ki jaka khappud bad ka Ri Bangladesh.