Nongpoh, K’Lyngkot 27: Ka kynhun Ïatreilang Village Organization, kaba kdup ïa 6 tylli ki Self Help Groups (SHGs) jong ka shnong Pahambir Them ha Ri-Bhoi District, mynta ka sngi ka la pynpaw ïa ka jingkmen bad jingsngew sarong hadien bala plie paidbah ïa ka ophis treikam ba thymmai jong ka kynhun, kaba la tei bha bad pynwandur itynnad.
Ïa kane ka ophis treikam la plie paidbah da u MLA ka Nongpoh, u Bah Mayralborn Syiem, kum u kongsan, ha kane ka jingïalang la donlang ruh u Bah Mathew Makdoh, Nominated MDC ka Nongpoh, u Bah B. Basawiamoit, Gram Sevak ka Nongpoh Circle Umling Block, u Bah Sency Lyngdoh, Lyngdoh ka Raid Nonglyngdoh, ka Kong Virginia Maring, President ka Ïatreilang Village Organization, u Bah B. Livingstone Makri, Rangbah Shnong Pahambir Them, lem bad kiwei kiwei ki riew paidbah.
Haba ai jingkren ha kane ka jingïalang, u Bah Mayralborn Syiem u la ai jingïaroh ïa ki nongïalam jong ka Ïatreilang Village Organization halor ka jingshakri ba ki la ai sha ka imlang ka sahlang. U la pynpaw ruh ïa ka jingsngewnguh ïa ki dkhot ka Village Organization bad ïa ki dkhot jong ki hynriew tylli ki SHGs kiba la trei shitom ryngkat ka jingïatylli ban kyntiew ïa ka jingim jong ki paidbah khlem kano kano ka mynsiem jingïabishni.
Kum shi bynta jong kane ka sngi, u MLA ka Nongpoh u la aiti ruh ïa ka work order sha ka Ïatreilang Village Organization na ka bynta ban pynbha bad pynitynnad shuh shuh ïa katei ka ophis treikam ba thymmai.
