Nongstoiñ, K’lyngkot 27: Ïa ka Republic Day ka ba 77 jong ka Ri India la rakhe ha Nongstoiñ da ka jingshitrhem bad ka jingkmen kaba khraw ha madan St. Peter’s Higher Secondary School, Nongstoiñ.
Ïa kane ka jingïalang la pynkup burom da u MLA ka Mawhati, u Bah Charles Marngar bad la synranlang da u Shri R.G Momin MLA ka Rambrai Constituency, ha kaba u la ïoh ban pynher ïa ka Lama lai rong ka Ri India, u la shim ruh ïa ka salute jong ki 10 tylli ki kynhun ba kynthup ïa ki pulit bad ki khynnah skul.
Ki la don haduh 8 tylli ki dur ba tableau itynnad ba la pyni na ki tnad sorkar bapher bapher kiba pyni ïa ki jingthmu bad ki jinglah jong ki. Kane ka jinglehkmen kaba kongsan ka la ai lad ïa ki paidbah jong ka Nongstoiñ bad ki jaka ba marjan ban ïawan lang bad ban rakhe ïa ka pateng kaba riewspah bad ka kolshor bapher bapher jong ka ri.
Ha kane ka jingïalang la ïashim bynta da ki riew pawkhmat, ki heh sorkar, ki samla pule, bad ki paidbah nongshong shnong. Kiwei pat kiba la ïadon bynta lang ha kane ka sngi ki kynthup ïa ka Smt Hema Nayak IAS, Deputy Commissioner West Khasi Hills District, Bah H. Kharkongor Superintendent of Police West Khasi Hills, Bah V.Swer MCS ADC, Bah E. Lyngdoh MCS BDO, Bah M.Skhemlon District and Session Judge, kiwei pat ki ophisar sorkar na ki tnad sorkar kiba pher, ki khynnah skul bad ki paidbah nongshong shnong ka West Khasi Hills District.
Kiwei pat ki bynta kiba la ïoh ban pyndep ha kane ka sngi ki kynthup ïa ka jingsam ïa ki khusnam da u Kongsan sha ki nongjop, kaba kynthup ïa ka best March Past bad ïakop shad La I riti kaba la khur ïa ka jingjop da ka skul JNV Nongstoiñ, best Tableau da ka Soil and Water Conservation, All Star Football Academy nongjop jong ka Republic Day Cup 2026.
La ïoh ruh ban sam ïa ka khusnam Best Block Level ASHA worker sha I Kong Risuklin na Pyndengrei CHC, katba ïa ka Best District ASHA Facilitator, West Khasi Hills District la sam sha u Greater Chance D Sangma jong ka Aradonga PHC na Mawshynrut Block .
La pynkut ïa kane ka prokram da ka jingrwai ïa ka State Anthem, ha kaba baroh kiba don ha katei ka jaka ki la ïashim bynta lang.
Ha Mawshynrut, u Bah Ronnie V.Lyngdoh, MLA, Mylliem Constituency, u la long u kongsan bad u la ïoh ban pynher ïa ka Lama Rai Rong jong ka Ri India. U la shim ruh ïa ka salute na ka bynta ki san tylli ki kynhun kba kynthup ïa ka Police bad ki skul, nalor kane la pyniphuh shuh shuh ïa kane ka sngi da ki cultural programe bad kiwei pat ki prokram.
