Ladep pyntbit 25 ngut ki doktor ha ka kyrdan PGDFM na ka CMC Vellore ban pynkhlaiñ ïa ki jaka sumar

Shillong, K’lyngkot 25 : 25 ngut ki Doctor na ka jylla Meghalaya ki la dep ban pyntbit ïalade ha ka kyrdan Postgraduate Diploma in Family Medicine (PGDFM) Program na ka Christian Medical College (CMC) Vellore. Kane ka jingthmu ka long ban pynkhlaiñ shuh shuh ïa ki jaka ai jingsumar ha kane ka jylla.
ïa kane ka jingaiti ïa ki syrnod la pynlong ha Dr H. Gordon Roberts Hospital, Shillong, ha kaba 22 ngut ki doctor kiba ai jingshakri ha ki jaka ai jing\sumar ka sorkar bad 3 ngut ki doctor na ka Dr H. Gordon Roberts Hospital kila ïoh pdiang ïa ka Postgraduate Diploma ka jongki.
Ka PGDFM program, ka dei kaba la kyrshan da ka National Health Mission (NHM), Meghalaya da ka jingïatreilang bad ka Christian Medical College (CMC), Vellore da ka jingthmu ban pynkup bor ïa ki nongtrei kiba hakhmat eh ha ka koit ka khiah ban ïoh ïa ki jinghikai kiba paka bad kiba ha kane ka juk kaba mynta ryngkat bad ka jingai jinghikai pyntbit ban shakri ha ki jaka ai jingsumar.
Kane ka program ka pynleit jingmut ha ka ban bteng ban ai jingsumar, ban pynduna ïa ka jingphah sumar ïa ki nongpang sha kiwei pat ki jaka sumar bad ban kyntiew ïa ka lad ban ïoh ïa ka jingsumar kaba bha khamtam eh ha ki thaiñ nongkyndong bad ha ki jaka kiba jngai bad kiba jynjar ban leit ban wan.
U Dr Sampath Kumar, IAS, Principal Secretary ka Health and Family Welfare, uba la pyniasoh lang ïalade ha kane ka jingïalang lyngba ki kor ki bor, ula banjur ïa ka jinglong kordor jong kane ka prokram ai jinghikai kaba la pynlong da ka CMC Vellore bad Dr H. Gordon Roberts Hospital, khamtam eh ïa ki doctor kiba leit shakri ha ki jaka kiba don ha kyndong eh. Ula pynïaryngkat bad ki jylla kum ka Bihar bad Chhattisgarh, kiba la seisoh ha ka ban pyndep ïa kum katei ka jait ai jinghikai ha ka rukom kaba heh ban kyntiew ïa ka jingai jingsumar ha ki jaka ai jingsumar.
Ula pashat ïa ki symboh, ba ha ki por ban wan ruh ka jylla Meghalaya kan ïai bteng ïa kane ban kyntiew ïa kane ka jingai jinghikai na ka bynta baroh ki Doctor kiba shakri ha baroh ki Primary Healthcare bad ula ai khublei ïa kine kiba la pyndep ïa kane ka jingai jinghikai bad kubur ïa ka jingdon ka mynsiem jong ka jingïatreilang kaba la lam ïa ka koit ka khiah ha ka jylla ban jam shaphrang.
U Ramkumar S, Health Secretary, ula pynpaw ba ka jingthmu kaba hakhmat jong kane ka PG Diploma in Family Medicine ka dei halor ki 3 tylli ki A ha ka ban ai jingshakri ïa ki paitbah kaba kynthup ia ka Accessibility ne ka lad ban ïoh jingsumar kaba suk ban ïoh, Affordability ne ka jinglah ban kot bor bad Availability ne ka jingdon.
Ula pynpaw ba ha ka jylla kum ka Meghalaya, ki nongpang kim don ïa ki lad ha kaba ïadei bad ka jingïoh ïa ka jingsumar, kumta ka long kaba kongsan bha ban pynkup bor ïa ki doctor da ki jinghikai pyntbit kiba paka ban weng ïa katei ka jingeh hapdeng ka jingai jingsumar kaba la kham pyntbit shuh shuh.
Ula ong, ba kane ka jingai jinghikai kan ïarap ha ka ban pynduna ban phah ïa ki nongpang sha kiwei pat hynrei kan ailad ïa ki ban khmih ïa ka jingpang bad ban ai jingsumar ban pynkhlaiñ ïa ka koit ka khiah ha ki shnong ki thaw. Ula kyntu ïa kine kiba la pyndep ïa kane ka jingpule ba kin long kum ki nongkit tiensyiem ïa kane ka prokram bad ka kdew ba kane kan ïarap ha ka ban kyntiew shibun ïa ka jingai jingshakri ïa ki paidbah.
U Ramakrishna Chitturi, IAS, Managing Director, NHM Meghalaya, ula banjur ïa ka bynta kaba kongsan jong kine ki doctor kiba la pyndep ïa kane ka jingpule ha ka ban wanrah ïa ka jingkylla ha ka koit ka khiah ha ka jylla Meghalaya.
Ka Dr. Janupribalas S. Momin ka Director of Health Services (Medical Institutions), kala ai ka jingithuh ïa ka jingskhem jingmut bad ïa ka jingdon ïa ka akor kaba long kongsan bha ban lah ban pyndep ïa kane ka Diploma. Kala banjur ba ki doctor kiba la ïoh ia kane ka sap thymmai na kane ka jingai jinghikai kin don ïa ka jingkitkhlieh kaba khraw ban pynkoit ïa ki jingim ïa kaba ym lah ban ñiew shuh bad kala pynkynmaw ïa ki, ba ka jingai jingsumar ka dei ban long da kaba bud ryntih ïa ki nongrim, kaba don ïa ka mynsiem sngewlem bad ka dei ruh ka jingïoh jinghikai ka bym ju kut.
U Dr. Kenneth Nongpiur, Medical Superintendent jongka Dr. H. Gordon Roberts Hospital, ula pynpaw ïa ka jingkmen ïa kane ka wat kaba nyngkong jong ki doctor kiba la pyndep ïa kane ka jingpule bad ong ba kane ka jingjop ka dei ka sakhi ïa ka jingtrei shitom ka jongki bad ka jinglen lade mynta palat 2 snem. Ula banjur ba kane ka Diploma kan wanrah ïa ka jingkylla ym da kaba pynleit jingmut tang ha ka ban tohkit bniah ïa ka jingpang hynrei ban ïaid ha ka lynti kaba long salonsar bad ka jingïadei bad ki nongpang.
Ki 4 ngut ki doctor kiba la pyndep ïa ka Diploma haba kren ha kane ka jingïalang kila pynpaw ba kitei ki 2 snem ba kila ïoh ïa ki jinghikai kala kylla long kum ka lynti ïaid kaba wanrah ïa ka jingkylla ha ki, kaba pynïasoh ïa ka jingïoh jinghikai kaba janai bad ka rukom treikam ka jongki ha ki jaka ai jingsumar.
Kila pynpaw ba kane ka prokram kala pynkupbor ïa ki ban ïaid shaphrang ban khmih ïa ki jingpang bad ban sumar ïa ki nongpang bad ïa ki bahaïing bahasem ka ban ïoh ïa ka jingshaniah kaba skhem ha ka ban shim ïa ki rai ha ka jingai jingsumar hapoh ki jaka sumar.
La sdang ïa kane ka jingai jingithuh ne ka jingpynkup burom, da kaba buh jingduwai kyrpang bad hadien kane la pynïaid shakhmat da ka jingsam ïa ki syrnod bad ka jingpynbam smai ïa ki doctor kiba la pyndep ïa ka jingpule ïa kaba la ïalam da ka Dr Adeline Sitther, kaba la ïengskhem ha ka jingshim ïa ka jingkitkhlieh ban aiti ïalade na ka bynta ban shakri ïa ki parabriew bad ban shimkhia ïa baroh ki kam da ka mynsiem jong ka jingïeit bad jingsngewsynei bad ban batskhem ha ka nongrim “Ym ban shah shakri hynrei ban shakri kylla”.
Kala pynshlur ïa kine kiba la pyndep ïa ka jingpule, ba ki dei ban trei da kaba bud ryntih bad ban pyndonkam ruh ïa ka jinghikai kaba kila ïoh, ban ai ka jingsumar da kaba buh hakhmat eh ïa ki nongpang bad ban shakri ïa ka imlang sahlang.