Ka jingpynkylla ïa ka MGNREGA sha ka VB-GRAMG ka dei ka jingnion beiñ ka BJP ïa kiba duk ha Meghalaya : Pala

Shillong, Kyllalyngkot 23 : U Nongïalam ka Congress ha kane ka jylla u ma Vincent H Pala u la ong ba ka jingleh jongka sorkar NDA hapoh ka jingïalam jongka BJP ban pynkylla ïa ka Mahatma Gandhi National Rural Employment Guarantee Act (MGNREGA sha ka skhim VB-GRAMG ka dei ka jingpynkhreh lypa ban nion ïa kiba duk ba kyrduh kiba im ja kyndoi jakpoh na ka bylla sngi hangne ha Meghalaya.
ïa kane u la kren ha ka jingialang ba la pynlong da ka MPCC ha Mawkyrwat, South West Khasi Hills ban pynkhlaiñ ïa ka Party ban ïeng pyrshah halor kane ka jingpynduh ïa ka MGNREGA.
Kane ka jingpynkylla ïa kane ka MGNREGA ka pynpaw ba ka BJP kam kheiñ snep ia kiba ba duk kiba kyrduh kiba im sha nongkyndong bad ïoh kamai lyngba kane ka jingbylla shispah sngi.
Ha kane ka jingïalang la ïakren kumno ka MGNREGA ka la kyrshan bad pynim ja ïa ki phew phew hajar tylli ki long ïing longsem hapoh ka jylla kumjuh ruh ïa ki hajar tylli ha South West Khsi Hills khamtam ha ki jaka ba kyndong.
Kiba la ai jingkren ki kynthoh ba ka jingwan rah ïa ka skhim VB-GRAMG kam long kaba shai ba suba, kam don u bud lum uba khlaiñ bad ka khlem kular ban aikam shispah sngi bad la shu leh tang ban pynduh ïa kane ka skhim MGNREGA.
Kiba bun ki riew rangbah kiba kren ha kane ka jingïalang ki pynpaw ba kane ka jingpynduh ïa ka MGNREGA ka dei tang namar ba ki paidbah ki ieit ïa kane ka skhim ba ki ïoh jingmyntoi. Ki kyntu ïa ki paidbah ban ïeng tylli lang kawei ban ïeng pyrshah ïa kum kine ki polisi kiba khniot ïa kiba duk ba kyrduh.
Ha kane ka jingïalang la ïohi ba ka Congress ka don ka jingkyrmen ban khie im biang ha kane ka jylla da ka jingwan pynïasoh kiba bun ki riew rangbah. Kiba la wan ban pynïasoh sha ka Congress ki kynthup ïa u bah Denis Nongsiej uba la shongthait kum u Joint Director ka tnad pule puthi, bah Barister Thyrniang kyrtong MDC ka KHNAM, Sngaphunlang Kharlyngdoh Assistant Lecturer Laban Assamese Higher Secondary School, Kordorlyne Kharlyngdoh VP ka Trinamool Congress Mawkyrwat.