Shillong, Kyllalyngkot 23 : U Myntri ka Tnad Pule Puthi u Ma Lahkmen Rymbui ula kyntu ïa u Prof Sumarbin Umdor ban shimti biang kum u Pro Vice-Chancellor ka North Eastern Hill University (NEHU), namar haduh mynta hi ym pat shym pdiang satia ïa ka shithi iehnoh kam ba ula aiti ha ka 15 tarik Nohprah 2025.
“Nga kyrpad ïa u Prof Sumarbin Umdor ba un shimti biang ïa ka kam khnang ba ka jingpynïaid ïa ka Ophis ha Shillong Campus kan ïaid shakhmat la ka long kumno kumno ruh” ong u Bah Lahkmen haba ïakren bad ki nongthoh khubor ha ka sngi Thohdieng. U la ong kane ka kynrum kynram ka bym poi shano shano ruh ka la ktah jur ïa ki kam pule dangle bad ka tulop ki nongtrei.
Kane ka jingkyrpad u Myntri kala wan hadien ba ki kynhun bapher bapher, kynthup ka NEHUSU, KSU-NEHU Unit, NEHUNSA bad NEHUTA ki la ïakynduh dang shen ïa u Myntri Rangbah ka Jylla u Conrad K Sangma bad Myntri ka Tnad Pule Puthi, kiba la kyrpad ïa ka Sorkar ba kan tuklar lem halor kane ka kam, kaba la mih na ka jingjah trei jong u Vice-Chancellor Prof PS Shukla mynta la 422 sngi.
Kane ka kynhun na NEHU kala dawa ïa ka Pro-VC ka Tura ba kan shimti ïa ka kam kum ka Acting VC kat kum ki kyndon jong ka Statutes ka NEHU hynrei haduh mynta kam pat ai ktien ei ei ruh em.
U Bah Lahkmen u pyntip ba ka Sorkar Jylla kala ïakren ïa kane ka kam bad ka Sorkar Pdeng ba kan peit ba kane ka jinglong jingman ha NEHU ka dei ban kut noh kham kloi kat kaba lah.
“Ka Ministry haduh mynta kam pat ong eiei bad ki jinglong jingman ki dang ïai neh kumjuh bad ngi tip ba u Pro-VC ka Shillong Campus Prof Umdor ula ai ïa ka shithi iehnohkam hynrei haduh mynta ym pat shym la pdiang satia ïa ka” ong u Bah Lahkmen.
“Ngi la ioh jingtip ruh ba ka don ka jingeh na ka liang ka Pro-VC ka Tura ba kan wan sha Shillong ban shimti ïa ka kam kum ka Acting VC. Kumta lada ym don Pro-VC ha Shillong kaba dei ka headquarter ka NEHU, kan sa ktah ïa shibun kiei kiei la ka dei ka pule dangle lane ka tulop ki nongtrei contract lane ki muster roll bad shisien ba kala ktah ïa ka Shillong Headquarter, kan ktah haduh 70 tylli ki college ka Jylla ba la pynïasoh bad ka NEHU” ula bynrap.
U Bah Rymbui ula pynpaw “Naba kam pat don satia ka jingpynbeit ka ban neh pura bad namar ka jingiehnohkam u Pro-VC ka Shillong ka dei ka bym pat pdiang, kumta, na ka bynta ka jingtreikam kaba ïaid beit ïaid ryntih jong ka University, nga kyrpad ïa u Pro Umdor ban shimti biang ïa ka kam khnang ba ki jingpynïaid kam hapoh ka Shillong Campus kin ïaid beit ïaid ryntih”.
“Nga kyrmen skhem ba ka Sorkar Pdeng bad ka Ministry of Education kin sa wanlam ïa ka jingpynbeit kaba neh shirta” bynrap u Myntri. Halor ka jingkylli, u Bah Lahkmen ula kyntu ïa u Prof Umdor ba un buh hakhmat eh ïa ka bha ka miat jong ki samla pule bad ki nongtrei da kaba ong “Nga buh ïa ka jingkyrpad ym namar kino kino ki daw hynrei namar ka bha ka miat ki samla pule bad ka bha ka miat ki nongtrei, kumta, katba ngi dang ap ïa ka rai ba khatduh jong ka Ministry, kan bha shibun ïa u Pro-VC ban shimti biang ïa ka kam”.
