Nongstoiñ, K’lyngkot 23: Kum ban ïasnohktilang bad ka ri baroh kawei, ka ophis jong ka Deputy Commissioner Eastern West Khasi Hills District ka la shim bynta lang da kaba pynlong ïa ka jingrakhe ïa ka National Voters’ Day ha Multipurpose Hall, DC Office, Mairang halor ka Phang, ‘My India, My Vote, Citizen at the Heart of Indian Democracy’.
La donlang ha kane ka jingrakhe da ki ROs, AROs, BLOs, ki nongthep vote kiba dang shu dep pynrung kyrteng ïalade ha ka electoral roll. Kiwei ki kynthup ïa u Bah A. Nongbri, ADC, Bah M. Diengdoh, ADC, Kong V.A. Hynñiewta, ADC, Dr. L. Hynñiewta BDO, Mairang Bah L. Myrthong, AC Bah Kyntiewbiang Syiem, Syiem ka Hima Myrïaw bad ki ophisar sorkar na ki tnad treikam bapher bapher.
Ka Kong V.A. Hynñiewta Additional Deputy Commissioner ha ka jingkren, ka la pynshai ïa ka jingmut jong ka jingrakhe ïa kane ka sngi kaba pynkynmaw ïa ka kamram ban leh kum ki nongshong shnong jong ka ri India na ka bynta ban pynwandur ïa ka ri bad ki nongshong shnong ha ka.
Ka la ong ruh ba kane ka sngi ka pynkynmaw ïa baroh ki nongthep vote ban jied ïa ki nongmihkhmat da la ka jong ka mon khlem da shah pynbor hano hano bad ban wanrah ïa ka jingjied kaba khuid. Ka la kyntu ruh ïa kito kiba la dap 18 snem ba kin wan shakhmat ban pynrung kyrteng noh ïalade ha ka electoral roll.
Ka la ïathuh ruh ba haba ïanujor bad ki snem kiba kham mynshwa, ka jingdon jong ki nongthep vote kiba shim bynta ha kaba thep ïa ki vote ha man la ki election, la shem ba ka la nangkiew bad kane ka pyni ba ki nongshong shnong ki la shai bad sngewthuh ïa ka jingkordor jong ka shi vote ka jong ki. Kumta ka la kyntu ïa baroh ba ki dei ban pyndonkam hok ïa la kamram ba la bynshet ha ki ban leh kum ki nongshong shnong.
U Bah A. Nongbri, Additional Deputy Commissioner, u la pyntip paidbah ba ka Election Commission ka la buh ïa saw tylli ki sngi ha ka shi snem kum kita ki ‘qualifying dates’ na ka bynta kito ki ban sa dap 18 snem ka rta ha ka 1 tarik Kyllalyngkot, 1 tarik Ïaiong, 1 tarik Jymmang bad 1 tarik Risaw, ba ki lah ban pynrung kyrteng ïalade ha ka electoral roll.
